Asooru gobbara Nennewe yinanni katami no; hakko katamira heeꞌranno manni bushaho. Yihowa Yoonaasi yinanni masaalaanchosi, ‘Nennewe hadhe mannu busha coye assa aguranno gede kuli’ yiisi. Yoonaasi kayinni Maganu yiinowa agure wolewa hige haꞌri. Isi Terseesi yinanniwa haꞌrara markaawe giddi.

Markaawe baaru aana hadhanni heedheenna dambalu kai; konni daafira markaawete giddo noo manni lowo geeshsha waajji. Insa magannansawa higge raartu; qoleno ‘Kuni qarri iillanni noonkehu mayiraati?’ yitu. Gedensaanni Yoonaasi togo yiinsa: ‘Bushu aneeti. Ani Yihowa assi yiinoere giwe xooqanni noommo. Dambalu uurrannona ane fushshitine baaru giddo tuggeꞌꞌe.’ Markaawete giddo noo manni Yoonaasi baaru giddo tuga dihasiꞌrino; Yoonaasi kayinni tuggeꞌꞌella yiinsa. Insa iso baaru giddo tugguta, dambalu uurri.

Yoonaasira reyannoha lawinosi. Isi wayi giddo lixi gedensaanni Yihowa huucciꞌrino. Yihowano Yoonaasi jawa qulxuꞌmicho egemmitanno gede assi; qulxuꞌmicho kayinni Yoonaasi dishitino. Yoonaasi qulxuꞌmichote godowi giddo heeꞌre, ‘Yihowa, xaate atera hajajameemmo’ yee huuccatto assiꞌri. Yihowa, Yoonaasi qulxuꞌmichote godowi giddo mittoreno ikkikkinni sase barra keeshshanno gede assino; hakkiinni qulxuꞌmicho iso massite moola baattora tuffanno gede assino.

Yihowa Yoonaasi gatisinosi; kayinni hatto yaa Yoonaasi Nennewe haꞌra dihasiissannosi yaateni? Deeꞌni. Yihowa xaano Yoonaasi ‘Nennewe  haꞌri’ yiisi. Hatte yannara Yoonaasi Yihowara hajajame Nennewe haꞌrino. Isi hakkira mare bushu mannira togo yii: “Nennewe 40 barri giddo baꞌanno.” Hakkiinni mittu hendoonnikki coyi ikki: Nennewete katamira heeꞌranno manni busha coye assa agure maaro eino. Nennewete katami moote mannaho togo yii: ‘Maganunniwa higgine raartine maaro eꞌe. Miteekke marare gatisannonkeha ikkannona.’ Yihowa mannu maaro einota afiti, Nennewete katama huna agurino.

Yoonaasi Maganu Nennewete katama huninokki daafira, lowo geeshsha hanqi. Hanni hedi: Yihowa Yoonaasi marare gatona yiinosi; Yoonaasi kayinni Nennewete katamira heeꞌranno manna gatona yaa giwino. Yoonaasi katamu giddonni fule haꞌre, buqqiichote caalira ofolli. Hakkiinni hatti buqqiicho moolte baꞌu; tennera Yoonaasi lowo geeshsha hanqino. Konni daafira Yihowa Yoonaasira togo yiisi: ‘Ati tenne buqqiichora dadillootto geeshsha, Nennewete mannira didadillootto. Ani insa marare gatisoommonsa.’ Yihowa Yoonaasira maa rosiisara hasiꞌrino? Nennewete manni aye haqqeno roorannota rosiisinosi.