Magraot an mga tawo ha Ninibe nga syudad han Asirya. Ginsugo ni Jehova an iya propeta nga hi Jonas nga kumadto hito nga syudad basi pahamangnoan an mga tawo nga kinahanglan hira magbag-o. Pero hi Jonas kinadto ha iba nga direksyon. Sinakay hiya hin barko pakadto ha Tarsis.

Han nakadto na an barko ha kalalawdan, nagkaada makusog nga bagyo, ngan nahadlok gud an mga marinero. Nag-ampo hira ha ira mga dios ngan nagpakiana: ‘Kay ano nga nahitatabo ini?’ Ha urhi, hi Jonas nagsiring ha ira: ‘Ako an angay basulon. Waray ko sugta an sugo ha akon ni Jehova. Ig-itsa ako ha dagat, ngan maundang an bagyo.’ Nadiri an mga marinero, pero nagpirit hi Jonas. Han igin-itsa nira hi Jonas ha dagat, inundang an bagyo.

Kahuna ni Jonas nga mamamatay na hiya. Samtang nagtitipailarom hiya ha dagat, nag-ampo hiya kan Jehova. Katapos, ginpahinabo ni Jehova nga lamyon hiya hin daku nga isda, pero waray hiya mamatay. Ha sulod han tiyan han isda, nag-ampo hiya: ‘Nagsasaad ako nga pirme na ako masugot ha imo.’ Ginpanalipdan ni Jehova hi Jonas ha sulod hin tulo ka adlaw samtang nakadto ha tiyan han isda, ngan ginpahinabo niya nga isuka hito hi Jonas ha baybayon.

Tungod kay gintalwas ni Jehova hi Jonas, karuyag sidngon ba nga diri na hiya makadto ha Ninibe? Diri. Ginsugo hiya utro ni Jehova nga  kumadto. Hini nga higayon, sumugot hi Jonas. Kumadto hiya ha Ninibe ngan ginsidngan an magraot nga umurukoy didto: ‘Kwarenta ka adlaw na la, bubungkagon na an Ninibe.’ Katapos, may nahitabo nga diri ginlalaoman​—an mga taga-Ninibe namati ngan nagbag-o. Ginsidngan han hadi han Ninibe an iya katawohan: ‘Pakimalooy kamo ha Dios, ngan pagbasol. Bangin man la diri kita niya pamatayon.’ Han nakita ni Jehova nga nagbasol an mga tawo, waray niya bungkaga an Ninibe.

Nasina hi Jonas han waray mabungkag an syudad. Hunahunaa la: Hi Jehova nagpailob ngan nagpakita hin kalooy kan Jonas, pero hi Jonas waray malooy ha mga taga-Ninibe. Lugod, kinadto hiya ha gawas han syudad ngan liningkod ha sirong han usa nga upo ngan nagminusdot. Katapos, an upo namatay salit nasina hi Jonas. Tungod hito ginsidngan hiya ni Jehova: ‘Mas nanganugon ka lugod hini nga tanom kay ha mga taga-Ninibe. Nalooy ako ha ira, salit waray hira mamatay.’ Ano an leksyon? An mga taga-Ninibe mas importante kay ha bisan ano nga tanom.