Ŵandu ŵa mumsinda wa Ninefe m’cilambo ca Asiliya, ŵaliji ŵakusakala. Yehofa ŵamsalile jwakulocesya jwakwe Yona kuti ajawule ku Ninefe kukwakalamusya ŵanduwo kuti acenje yitendo yawo. Nambo Yona ŵatisile ni kwawula kwine. Jwalakwe ŵakwesile combo cacajawulaga ku Talisi.

Kaneko kwatandite cimbungo camacili, mwati ŵakwendesya combowo wakamwile woga. Jemanjajo ŵatandite kupopela kwa milungu jawo ni kujiwusyaga kuti, ‘Ligongo cici yeleyi yikutendekwa?’ Pambesi pakwe, Yona ŵasalile jemanjajo kuti, ‘Uneji ni jundendekasisye yeleyi. Nganile kutenda yasalile Yehofa. Anyakule ni kumbonya m’nyasamu, ni nyasaji cijatondoŵele jemanja.’ Ŵakwendesya combo ŵala nganasaka kutenda yaŵasalile Yona yila, nambo jwalakwe ŵakanganicisye kuti amponye basi. Paŵamponyisye m’nyasamo, cimbungoco calesile.

Yona jwaganisyaga kuti cawe basi. Jwalakwe paŵatiŵilaga m’nyasamo jwapopesile kwa Yehofa. Kaneko Yehofa ŵatumisye cisomba cekulungwa. Cisombaco cagambile kum’mila Yona, nambo nganawa. Ali m’matumbo mwa cisombaco, Yona jwapopesile kuti, ‘Ngwasimicisya kuti cinapikanileje ndaŵi syosope.’ Yehofa ŵatendekasisye kuti Yonajo akawa mkati mwa cisombaco. Ni ŵatemi kwa masiku gatatu m’matumbo mwa cisombaco, kaneko Yehofa ŵacitendekasisye cisombaco kuja kumlukula Yona kumkuli.

Pakuŵa Yehofa ŵamkulupwisye Yona, ana yeleyi yagopolelaga kuti Yonajo nganasosekwasoni kwawula Ninefe kula? Iyayi. Yehofa ŵamsalilesoni Yona kuti ajawule ku Ninefe. Pandaŵi jeleji Yona jwapikanile. Jwapite kumaloko ni  kwasalila ŵandu ŵakusakala ŵala kuti, ‘Panyuma pamasiku 40, Ninefe cajonanjidwe.’ Kaneko kwatendekwe cindu cangacijembeceya. Ŵandu ŵa ku Ninefe ŵala ŵapikanile soni ŵacenjile ndamo syawo. Mwenye jwa ku Ninefe jwasalile ŵandu ŵakwe kuti, ‘Aŵilanjile pa Mlungu, soni apitikuce mitima, kuti mwine jwalakwe komboleka kututendela canasa.’ Yehofa paŵayiweni kuti ŵandu ŵala apitikwice mitima jawo, nganajonanga msinda wa Ninefe wula.

Yona jwatumbile ligongo lyakuti msinda wa Ninefe nganiwujonanjidwa. Mgambe ganisya, Yehofa ŵamtendele canasa soni kumkululucila Yona. Nambo jwalakwe nganiŵatendela canasa ŵandu ŵa ku Ninefe. M’malo mwakwe, mwakutumbila jwalakwe jwapite kukutama kusa kwa msindawo pam’bulili wa cakumela ca mtundu wa mbonda. Kaneko cakumela cila cajumwile, yeleyi yamtumbilikasisye mnope Yona. Pelepo Yehofa ŵamsalile Yona kuti, ‘Mkucitendela canasa cakumelaci m’malo mwakwatendela canasa Aninefe. Nalosisye canasa, soni akulupwice.’ Ana yaŵatesile Yehofayi yagopolelaga cici? Ŵandu ŵa mu Ninefe ŵaliji ŵakusosekwa mnope kupunda cakumela cilicose.