D Weltmacht Assyrie het s 10-Stämme-Riich Israel iigno. Jetzt wett de König vo Assyrie, de Sanherib, au no s 2-Stämme-Riich Juda erobere. Er fangt a, gege ei Stadt nach de andere z kämpfe und gwünnt jedes Mal. D Stadt, wo er unbedingt wett erobere, isch Jerusalem. De Sanherib weiss aber nid, dass Jehova Jerusalem beschützt.

De Hiskia, de König vo Juda, zahlt em Sanherib ganz vil Geld, demit er Jerusalem in Rueh laat. De Sanherib nimmt das Geld, schickt aber gliich sini mächtige Chrieger uf Jerusalem, zum si azgriife. D Assyrer chömmed immer nöcher und nöcher, drum hend d Mensche i dere Stadt fescht Angscht. De Hiskia seit ihne: «Ihr müend kei Angscht ha. D Assyrer sind starch, aber mit Jehova sind mir no vil stärcher.»

De Sanherib schickt sin Rabschake, das isch sin Kurier, uf Jerusalem. Dört staht de Rabschake vor d Stadtmuur hii und rüeft de Mensche spöttisch zue: «Jehova cha euch nid helfe. Glaubed em Hiskia nid, er wett euch nume tüsche. Es git kei Gott, wo euch vor üsem Agriff cha beschütze.»

De Hiskia fragt Jehova, was er söll mache. Jehova seit ihm: «Laa dir vo dem Rabschake kei Angscht ijage. De Sanherib wird Jerusalem nid erobere.» Aber denn schickt de Sanherib em Hiskia Briefe. Dört inne staht: «Gib uf! Jehova cha dich nid rette.» De Hiskia betet: «Bitte, Jehova, hilf üs, demit alli gsehnd, dass du de wahr Gott bisch.» Jehova seit denn zu ihm: «De König vo Assyrie wird Jerusalem nid erobere, wil ich wird mini Stadt beschütze.»

De Sanherib isch ganz sicher, dass Jerusalem glii ihm wird ghöre. I dere Nacht schickt Jehova aber sin Engel is Lager vo de Assyrer. De Engel tötet 185 000 Soldate! De König Sanherib het sini beschte Chrieger verlore und muess ufgee. Es bliibt ihm nüt anders übrig, als heizgah. Jehova het de Hiskia und Jerusalem beschützt, genauso wie ers versproche het. Wenn du dazumal z Jerusalem gsi wärsch, hättisch au eso uf Jehova vertraut?