Nasakop sang Emperyo sang Asiria ang napulo ka tribo nga ginharian sang Israel. Gusto man sakupon ni Senaquerib, nga hari sang Asiria, ang duha ka tribo nga ginharian sang Juda. Amat-amat niya nga ginsakop ang mga siudad sang Juda. Pero ang gusto gid niya sakupon amo ang siudad sang Jerusalem. Wala kabalo si Senaquerib nga ginaproteksionan ni Jehova ang Jerusalem.

Si Ezequias, nga hari sang Juda, nagbayad kay Senaquerib sing madamo nga kuarta para indi niya pagsalakayon ang Jerusalem. Bisan ginbaton ni Senaquerib ang kuarta, ginsugo gihapon niya ang iya mga soldado nga salakayon ang Jerusalem. Hinadlukan ang mga tawo sa siudad kay nagapalapit na ang mga Asirianhon. Dayon ginsilingan sila ni Ezequias: ‘Indi kamo mahadlok. Mabakod ang mga Asirianhon, pero himuon kita ni Jehova nga mas mabakod sa ila.’

Ginpadala ni Senaquerib ang iya mensahero, ang Rabsaces, sa Jerusalem para pahugon ang mga tawo. Nagtindog ang Rabsaces sa gua sang siudad kag nagsinggit: ‘Indi kamo mabuligan ni Jehova. Indi kamo magpainto kay Ezequias. Indi kamo maproteksionan sang bisan sin-o nga dios kontra sa amon.’

Namangkot si Ezequias kay Jehova kon ano ang dapat niya himuon. Si Jehova nagsabat: ‘Indi ka mahadlok sa ginasiling sang Rabsaces. Indi masakop ni Senaquerib ang Jerusalem.’ Dayon, may nabaton nga pila ka sulat si Ezequias halin kay Senaquerib. Mabasa sa mga sulat: ‘Magsurender na kamo. Indi kamo maluwas ni Jehova.’ Si Ezequias nangamuyo: ‘Palihug, Jehova, luwasa kami, para mahibaluan sang tanan nga ikaw lamang ang matuod nga Dios.’ Si Jehova nagsiling sa iya: ‘Indi makasulod sa Jerusalem ang hari sang Asiria. Proteksionan ko ang akon siudad.’

Sigurado gid si Senaquerib nga maagaw niya ang Jerusalem. Pero isa ka gab-i, si Jehova nagpadala sing isa ka anghel sa kampo sang mga soldado sa gua sang  siudad. Ginpatay sang anghel ang 185,000 ka soldado! Napatay ang tanan nga pinakamaayo nga soldado ni Hari Senaquerib. Wala na sia sing mahimo kundi magpauli nga napierde sa inaway. Gintuman gid ni Jehova ang iya promisa nga proteksionan si Ezequias kag ang Jerusalem. Kon didto ka sa Jerusalem sang natabo ini, magasalig ka man bala kay Jehova?