Ouhonapare auhe waAsur wa kambura ouhona womihoko 10 vyaIsrael. Nai Sanherib, ombara yaAsur, aai vanga okuhonaparera ouhona womihoko 2 vyaJuda. Eye wa uta okukambura ovihuro vyaJuda kotjimwetjimwe. Posiya otjihuro tjaa vanga tjinenenene tja ri Jerusalem. Otjiṋa Sanherib tjee hari ama tjiwa otjohi tjokutja Jehova aa tjevere Jerusalem.

Hiskija, ombara yaJuda, ya suta Sanherib ovimariva ovingi kutja ma ise Jerusalem. Nandarire kutja Sanherib wa kambura ovimariva, eye ngunda wa hinda otjimbumba tje otjinamasa tjovita kutja tji ye ku havera Jerusalem. Ovandu motjihuro va uta okutira, orondu Ovaasur aave yende amave ryama popezu. Okuzambo Hiskija wa tja ku wo: ‘Amu tira. Ovaasur ve nomasa, posiya Jehova me tu pe omasa okukapita inga owawo.’

Sanherib wa hinda omuhongore we koJerusalem kutja ma kayamburure otjiwaṋa. Omuhongore wa kurama pendje yotjihuro na ravaere a tja: ‘Muhona kena ku yenena okumuvatera. Amu yandjere Hiskija okumuwovisa. Kapena mukuru ngu ma yenene okumuyama ku eṱe.’

Hiskija wa pura ku Jehova kutja nga tjite vi. Jehova we mu zira na tja: ‘Amu urumisiwa i oviṋa omuhongore mbi ma hungire. Sanherib kemee mu yeka Jerusalem.’ Okuzambo Hiskija wa muna otutuu okuza ku Sanherib. Otwo twa tja: ‘Yumba ohama uriri. Jehova kena ku yenena okumuyama.’ Hiskija wa kumba na tja: ‘Arikana Muhona tu yama, kokutja ovandu akuhe ve tjiwe kutja oove erike ngu ri Ndjambi watjiri.’ Jehova wa tja ku ye: ‘Ombara yaAsur kai nokuya moJerusalem. Ami me yama otjihuro tjandje.’

Sanherib wa ri nongamburiro okuura kutja Jerusalem matji rire otje. Posiya ouṱuku umwe, Jehova wa hinda omuengeli poruveze ovarwe pu va tonene  ozondanda zawo pendje yotjihuro. Omuengeli wa zepa ovarwe 185 000! Ombara Sanherib wa pandjara ovarwe ve ovanamasa tjinenenene. Eye kari nomuano warwe pendje nokuyenda konganda, a taarwa. Jehova wa yama Hiskija na Jerusalem otja pa kwizika. Andakuzu wa ri moJerusalem, ove otjokara nongamburiro mu Jehova?