ĨSOMO YA 55
Mũlaĩka wa Yeova Nĩwamũsũvĩie Esekia
Ve ĩvinda ũsumbĩ wa Asuli wasindie mbaĩ ila syaĩ ungu wa ũsumbĩ wa mbaĩ ĩkũmi wa Isilaeli na wambĩĩa kũisumbĩka. Na ĩndĩ mũsumbĩ wa ũsumbĩ ũsu wa Asuli ũla weetawa Senakelivu enda kũsinda ũsumbĩ wa mbaĩ ilĩ wa Yuta. Ambĩĩie kwa kũsinda ndũa ĩmwe kũthi ĩla ĩngĩ katĩ wa ila syaĩ ũsumbĩnĩ ũsu wa Yuta. Ĩndĩ ndũa ĩla Senakelivu wendaa mũno nĩ Yelusaleme. Senakelivu aivanga maũndũ asu ndeesĩ kana Yeova nĩwasũvĩaa Yelusaleme.
Mũsumbĩ wa Yuta ũla weetawa Esekia nĩwanengie Senakelivu mbesa mbingĩ nĩ kana ndakose Yelusaleme. O na kau Senakelivu nĩwoosie mbesa ila wanengiwe, nĩwatũmie asikalĩ make ala maĩ na vinya mũno mavithũkĩe Yelusaleme. Yĩla asikalĩ ma Asuli mathengeeie ndũa ya Yelusaleme, andũ nĩmakwatiwe nĩ wia mũno. Nĩvo ĩndĩ Mũsumbĩ Esekia wameie atĩĩ: ‘Mũikakĩe. Kwa wʼo Aasuli me vinya mũno, ĩndĩ Yeova akatuma twĩthĩwa na vinya mbee woo.’
Senakelivu nĩwatũmie Lavi-sake ndũanĩ ya Yelusaleme nĩ kana akathekeee andũ ma ndũa ĩsu. Lavi-sake aendie kũũngama nza wa ndũa ĩsu na aneena na wasya mũnene ayasya: ‘Yeova ndatonya kũmũtethya. Mũikaeke Esekia amũkenge. Vaiĩ ngai ĩtonya kũmũsiĩĩa tũikamũsinde.’
Esekia nĩwamũkũlilye Yeova ũndũ waĩle kwĩka. Nĩvo ĩndĩ Yeova wamwĩie: ‘Ndũkatelemwʼe nĩ ndeto sya Lavi-sake. Senakelivu ndakosa Yelusaleme ĩtwʼĩke yake.’ Ĩtina wa ũu, Esekia nĩwakwatie valũa syumĩte kũla kwĩ Senakelivu. Valũa isu syaĩtye atĩĩ: ‘Ĩnenganei mokonĩ maitũ. Yeova ndesa kũmũtangĩĩa.’ Yĩla Esekia wasomie ndeto isu, amũvoyie Yeova amwĩa: ‘Mwa Yeova tũtangĩĩe nĩ kana kĩla mũndũ amanye kana no uwe Ngai wa wʼo wĩ weka.’ Nake Yeova amũsũngĩa: ‘Mũsumbĩ wa Asuli ndakakinya Yelusaleme. Ngasũvĩa ndũa ĩsu yakwa.’
Senakelivu aĩ na mũĩkĩĩo vyũ kana nũkũsinda Yelusaleme. Ĩndĩ ũtukũ ũmwe Yeova nĩwatũmie mũlaĩka vala asikalĩ ma Senakelivu mambĩte kambi. Mũlaĩka ũsu ooaie asikalĩ 185,000 na ũu watuma Mũsumbĩ Senakelivu asya asikalĩ make ala maĩ na vinya mũno. Ndaĩ na ũndũ ũngĩ wa kwĩka eka o kũkĩa kaũ na aisyoka mũsyĩ. Kwa nzĩa ĩsu Yeova nĩwamũsũvĩie Esekia na Yelusaleme o ũndũ wawetete. Keka waĩ Yelusaleme we nĩwĩthĩwa wamwĩkwatisye Yeova?
“Mũlaĩka wa Yeova nũmathyũlũlũkaa ngalĩ syonthe ala mamũkĩaa, na kũmavonokya.”—Savuli 34:7
