Ouhamba waAssiria owa li wa kwata ko omapata omulongo aIsrael. Sanherib, ohamba yaAssiria okwa li a hala okukwata ko omapata avali ouhamba waJuda. Okwa enda ta kwata ko oilando yaJuda kooshimwe nooshimwe. Ashike okwa li a hala unene okukwata ko Jerusalem. Sanherib ka li e shii kutya Jehova ota amene Jerusalem.

Hiskia, ohamba yaJuda, oya li ya futa Sanherib oimaliwa ihapu opo a efe Jerusalem. Nonande Sanherib okwa li a tambula oimaliwa oyo, okwa li natango a tuma etangakwaita enaenghono li ka kwate ko Jerusalem. Ovanhu moshilando ova li va tila, molwaashi Ovaassiria ova li tava ehene popepi neenghono. Opo nee Hiskia okwa li e va lombwela a ti: ‘Inamu tila. Ovaassiria ove na eenghono, ashike Jehova ote ke tu pameka tu va dule.’

Sanherib okwa li a tuma omutumwa, Rabsake, kuJerusalem opo a ka sheke oshiwana. Rabsake okwa li a kala ofika kondje yoshilando ndele ta ingida ta ti: ‘Jehova ita dulu oku mu kwafela. Inamu shiivika oulai kuHiskia. Kape na kalunga oo ta dulu oku mu xupifa momake etu.’

Hiskia okwa li a pula Jehova kutya na ninge po shike. Jehova okwe mu nyamukula a ti: ‘Ino tilifwa keendjovo daRabsake. Sanherib ita ka kwata ko Jerusalem.’ Okudja opo, Hiskia okwa li a yakula eenhumwafo da dja kuSanherib. Eenhumwafo odo oda ti: ‘Liyandja ashike. Jehova ita dulu oku ku xupifa.’ Hiskia okwa ilikana a ti: ‘Jehova tu xupifa, opo keshe umwe a shiive kutya oove auke Kalunga kashili.’ Jehova okwa li e mu lombwela a ti: ‘Ohamba yaAssiria itai ke uya mo muJerusalem. Ohandi ka amena oshilando shange.’

Sanherib okwa li ta diladila kutya oku li pokukwata ko Jerusalem. Ashike oufiku umwe, Jehova okwa li a tuma omweengeli umwe konhanda yOvaassiria kondje yoshilando, ndele ta dipaa ovakwaita 185 000. Ohamba Sanherib oya li ya kanifa etangakwaita layo enaenghono, nomolwaasho oya li ya shuna keumbo molwaashi oya findwa. Jehova okwa li a amena  Hiskia naJerusalem, ngaashi ashike a li a udaneka. Ngeno owa li muJerusalem, mbela ngeno owa kala ngoo we lineekela Jehova?