Mubuso Omaata wa Asiria neuzamaisa mubuso wa Isilaele wa masika alishumi. Senakeribi mulena wa Asiria, naabata kuzamaisa ni mubuso wa Juda wa masika amabeli. Akalisa kuunga mileneñi ya Juda ulimuñwi ka ulimuñwi. Kono naabata hahulu muleneñi wa Jerusalema. Senakeribi naasazibi kuli Jehova naasileleza muleneñi wa Jerusalema.

Ezekiasi yena mulena wa Juda, alifa Senakeribi masheleñi amañata ilikuli atuhele kukataza batu ba mwa Jerusalema. Nihaike kuli naangile masheleñi ao, Senakeribi aluma mpi yahae yetuna kuto lwanisa Jerusalema. Batu ba mwa muleneñi nebaikalezwi bakeñisa kuli Maasiria nebanze basutelela hahulu. Cwale Ezekiasi ababulelela kuli: ‘Musike mwasaba. Maasiria batiile, kono Jehova uka lutiisa hahulu kubafita.’

Senakeribi aluma mubuleli wahae, yena Rabishake, kuya kwa Jerusalema kuli ayo sheununa batu. Rabishake ayema fande a muleneñi mi ahuwa kuli: ‘Jehova hakoni kumitusa. Musike mwatuhelela Ezekiasi kumipuma. Hakuna mulimu yakona kumisileleza ku luna.’

Ezekiasi akupa Jehova kuli amutaluseze zanaaswanela kueza. Jehova aalaba kuli : ‘Usike wasabiswa ki zabulezi Rabishake. Senakeribi haana kuhapa Jerusalema.’ Hape, Ezekiasi aamuhela mañolo anaazwa ku Senakeribi. Mañolo ao naabulela kuli: ‘Uzwafe feela. Jehova haakoni kukusileleza.’ Kacwalo, Ezekiasi alapela, ali: ‘Jehova lwakukupa lupilise, kuli batu kaufela bazibe kuli ki wena feela Mulimu anosi wa niti.’ Jehova kihaa li ku yena: ‘Mulena wa Asiria haana kukena mwa Jerusalema. Nikasileleza muleneñi waka.’

Senakeribi naanani buikolwiso bwa kuli Jerusalema neituha iba yahae. Kono zazi leliñwi busihu, Jehova aluma lingeloi kwa sibaka kone batomile mafulo masole ili kwande a muleneñi. Lingeloi labulaya masole ba 185,000! Mulena Senakeribi alatehelwa ki mpi  yahae yetuna ka kufitisisa. Hakuna zanaakona kueza kacwalo akutela habo yena. Jehova naasilelelize Ezekiasi ni muleneñi wa Jerusalema, sina feela mwanaasepiselize. Kambe nemuliteñi mwa Jerusalema, kana nemuka sepa Jehova?