Tekiuajkayotl asirio okinmoaxkati majtlaktli tlanechikolmej itech Israel. Pero ueyi tekiua asirio tlen omotokayotiaya Senaquerib noijki okinekiaya kinmoaxkatis ome tlanechikolmej itech Judá. Ik non, okinmoaxkatijtiaya altepemej itech Judá. Pero okachi okinekiaya kimoaxkatis Jerusalén. Senaquerib amo okimatiaya Jehová okimaluiaya non altepetl.

Ezequías otlanauatiaya itech Judá uan okimakak Senaquerib miak tomin para amo kimoaxkatiskia Jerusalén. Maski Senaquerib okiseli tomin, okintitlanki isoldados para kimoaxkatiskia Jerusalén. Akinmej ompa ochantiayaj sapanoa omomojtijkej porque yoajsitokaj asirios. Pero Ezequías okinmilui: “Amo ximomojtikan. Asirios chikauakej, pero Jehová kichiuas ma tiyetokan okachi tichikauakej”.

Senaquerib okititlanki se tlakatl tlen okiluiayaj rabsaqué para ma kinpinauiti akinmej ochantiayaj Jerusalén. Ijkuak rabsaqué oajsito Jerusalén, chikauak okijto: “Jehová amo uelis namechpaleuis. Amo ma namechkajkayaua Ezequías. Nion se dios uelis namechmakixtis”.

Ezequías okitlajtlani Jehová tlen kichiuaskia uan Jehová okinankili: “Amo ma mitsmomojti tlen okijto rabsaqué. Senaquerib amo kimoaxkatis Jerusalén”. Satepan, Senaquerib okintitlanili cartas Ezequías, kanin okijtoaya: “Amo ximoteuikan. Jehová amo namechmakixtis”. Ijkuakon, Ezequías omotlatlaujti uan okijto: “Jehová, nimitstlatlaujtia, techmakixti uan ijkon nochtin kimatiskej te melauak toTajtsin Dios”. Uan Jehová okinankili: “Ueyi tekiua asirio amo kalakis Jerusalén. Ne nikmaluis noaltepe”.

Senaquerib okineltokaya san niman kimoaxkatiskia Jerusalén. Pero se yoak, Jehová okititlanki se ángel kanin okatkaj soldados asirios. ¡Nin ángel okinmikti  185,000 (ciento ochenta y cinco mil) soldados! Nochtin isoldados Senaquerib tlen okachi chikauakej omikej. Senaquerib omokuepki ikalijtik. Ijkon Jehová okichi tlen okijto uan okimakixti Ezequías uan altepetl Jerusalén. Tla ompa tiyetoskia, ¿titlaneltokaskia itech Jehová?