Famatörö Gizaraʼeli si fulu mado, no tobali Amatöröwa Asiria. Iadaʼa razo Asiria sotöi Saneribi, omasi ia ifatörö Yehuda si dombua mado. Fefu mbanua si so ba Yehuda idaʼi-daʼi manö wangokhögö. Hizaʼi, banua fondrege zomasi ia yaʼia daʼö Yeruzalema. Lö iʼila Saneribi wa Yehowa zolumöʼö Yeruzalema.

Me luo daʼö, razo Yehuda yaʼia daʼö Hisikia. Oya gefe nibeʼe Hisikia khö Zaneribi enaʼö lö isuwö Yeruzalema. Itema gefe daʼö Saneribi, hizaʼi hasambalö ifatenge zaradadunia ba wanuwö Yeruzalema. Ataʼu niha sato ba mbanua daʼö, börö me itugu ahatö niha Asiria. Andrö imane Hisikia, ’Böi miʼataʼufi. Sindruhu wa abölö niha Asiria, hizaʼi abölö nasa ita moroi khöra ibeʼe Yehowa.’

Ifatenge Saneribi zotöi Rabisake ba Yeruzalema ba wangoʼaya niha sato ba daʼö. Mosindro baero göli mbanua Rabisake andrö ba muʼao ia, ’Tebai itolo ami Yehowa. Böi ilimo ami Hisikia. Lö hadöi lowalangi si tola molumöʼö yaʼami.’

Manofu Hisikia khö Yehowa hadia zinangea ifalua. Imane Yehowa, ’Böi ataʼufi wehede Rabisake andrö. Tebai irabu Yeruzalema Saneribi.’ Aefa daʼö, itema zura Hisikia moroi khö Zaneribi. Ba zura andrö imane Saneribi, ’Angala manö. Tebai iʼefaʼö ami Yehowa.’ Börö daʼö, mangandrö Hisikia, ’He Yehowa, tolo ndraʼaga, enaʼö aboto ba dödö niha fefu wa ha yaʼugö Lowalangi sindruhu.’ Imane khönia Yehowa, ’Lö möi razo Asiria ba Yeruzalema. Yaʼodo zolumöʼö banua daʼö.’

Faduhu dödö Zaneribi ba zi lö ara tö tobali okhötania Yeruzalema. Hizaʼi ba zi bongi daʼö, ifatenge samösa malaʼikania Yehowa ba nahia ndra saradadu Asiria baero mbanua andrö. So 185.000 zaradadu nibunu malaʼika daʼö! Mate fefu zaradadu sagabölö khö Razo Saneribi. Börö daʼö,  iʼaʼuö manö mangawuli. Yehowa zolumöʼö Hisikia hegöi Yeruzalema, simane si no ifabuʼu. Na so ndraʼugö me luo daʼö ba Yeruzalema, hadia faduhu göi dödöu khö Yehowa?