Asiria nacionpa alläpa puëdeq tröpankunam Israelchö chunka kastakunata ushakätsishqa kayarqan. Y Asiriapa reynin Senaqueribqa Judächö ishkë kastakunatapis ushakätsitam munarqan. Tsëmi Judächö markakunata jukllëllapayan ushakätsir qallëkurqan. Peru masqa Jerusalen markatam ushakätsita munarqan. Peru imatam sïqa musyarqantsu, tsë markata Jehovä cuidanqantam.

Judäpa reynin Ezequïasqa mëtsika qellëtam Senaqueribta qorqan Jerusalenta mana ushakätsinampaq. Peru tsëta chaskikarpis, Senaqueribqa alläpa puëdeq tröpantam Jerusalenman kacharqan. Y ichikllachöna chäriyänampaq kaqta musyarirmi Jerusalenchö nunakunaqa alläpa mantsakäyarqan. Peru Ezequïasqa kënömi nirqan: “Ama mantsayëtsu. Asiria nunakuna puëdeq kayaptimpis, Jehoväqa pëkunapitapis mas puëdeq kanapaqmi yanapamäshun”.

Senaqueribqa willakoqnin rabsaquëtam kacharqan Jerusalenchö täraq nunakunapita burlakunampaq. Tsëmi Jerusalenpa punkunman chärir kënö nirqan: “Jehoväqa manam yanapayäshunkitsu. Ama jaqiyëtsu Ezequïas tsëta creitsiyäshunëkita. Noqakunapitaqa manam ni mëqan diospis tsapäyäshunkitsu”.

Ezequïasqa “¿imatataq rurashaq?” nirmi Jehoväta tapurqan, tsënam Jehoväqa kënö nirqan: “Ama mantsëtsu rabsaquë nishunqëkita. Senaqueribqa manam Jerusalenta ushakätsinqatsu”. Tsëpitam Ezequïasqa Senaqueribpa kënö neq cartanta chaskirqan: “Amana sinchi tukuyënatsu. Jehoväqa manam salvayäshunkitsu”. Tsënam Ezequïasqa kënö mañakurqan: “Jehovä, qamlla rasumpa Dios kanqëkita musyayänampaq salvëkayämë”. Jehovänam kënö nirqan: “Asiriapa reyninqa manam Jerusalenman yëkamunqatsu. Porqui noqam markäta tsapäshaq”.

“Jerusalentaqa rasllachi ushakäratsishaq” nirqanmi Senaqueribqa. Peru juk paqasmi Jerusalenpa amänunchöna këkaq Asiria tröpakunaman juk angelta  Jehovä kacharqan. ¡Y 185.000 soldädukunatam tsë angelqa wanuratsirqan! Rey Senaqueribqa puëdeq soldädunkuna ushakärishqa kayaptinmi, wayinman piñashqa kutikurqan. Änikunqannöllam Jehoväqa Ezequïasta y Jerusalenta salvarqan. Pensari, Jerusalenchö kawashqa karqa, ¿Jehoväman confiakunkimantsuraq karqan?