Azo ti Assyrie ahon royaume ti amara bale-oko ti Israël na ngangu. Fadeso Sennakérib, so ayeke gbia ti Assyrie, aye ti mû royaume ti amara use ti Juda. Lo komanse na mungo agbata ti Juda oko na oko. Me gbata so lo ye mingi ti mû ni ayeke Jérusalem. Ye so Sennakérib ahinga ape ayeke so Jéhovah ayeke bata gbata ti Jérusalem.

Ézéchias, so ayeke gbia ti Juda, amû gbâ ti nginza na Sennakérib tongaso si lo zia Jérusalem yamba. Atâa so Sennakérib amû nginza ni, lo tokua kamême angangu turugu ti lo ti gue ti tiri bira na Jérusalem. Mbeto ahon ndö ti azo ti gbata ni ngbanga ti so azo ti Assyrie ayeke pusu nduru nduru. Ézéchias atene na ala: ‘Ala sara mbeto ape. Azo ti Assyrie ayeke na ngangu, me Jéhovah ayeke sara si e ga même ngangu ahon ala.’

Sennakérib atokua mbeni zo, so a iri lo Rabshaké, ti gue na Jérusalem ti he azo ti gbata ni. Rabshaké ni aluti na gigi ti gbata ni na lo dekongo, lo tene: ‘Jéhovah apeut ti aidé ala ape. Ala zia Ézéchias ahanda ala pëpe. Mbeni nzapa so alingbi ti bata ala ayeke dä ape.’

Ézéchias ahunda na Jéhovah ye so lo doit ti sara. Jéhovah atene na lo: ‘Sara mbeto ti tënë so Rabshaké atene so ape. Sennakérib ayeke mû Jérusalem ape.’ Na pekoni, Sennakérib atokua alettre na Ézéchias. Na yâ ti alettre ni, lo tene: ‘Ye gï da awe. Jéhovah alingbi ti sö mo ape.’ Ézéchias asambela, lo tene: ‘Pardon, Jéhovah, sö e, tongaso si azo kue ahinga so gï mo oko la mo yeke tâ Nzapa.’ Jéhovah atene na lo, atene: ‘Gbia ti Assyrie ayeke mû ande Jérusalem ape. Mbi yeke bata gbata ti mbi.’

Sennakérib apensé so na yâ ti kete ngoi Jérusalem ayeke ga ti lo. Me gï na mbeni bï oko, Jéhovah atokua mbeni ange na ndo so aturugu ni asara camp ti ala dä na gigi ti gbata ni. Ange ni afâ aturugu 185 000!  Gbia Sennakérib aperdre angangu turugu ti lo. Mbeni ye so lo lingbi ti sara ayeke dä encore ape, gï ti kiri na ndo ti lo awe. Jéhovah abata Ézéchias nga na Jérusalem, tâ gï tongana ti so lo tene. Tongana mo yeke lani na Jérusalem, eskê mo yeke sara fade confiance na Jéhovah?