Ассирийжилер Израильдиң он аймаан эжелеп алган. Ассирияның хааны Сеннахирим Иуданың ийи аймаан база эжелеп алыр деп шиитпирлээн. Иуданың хоорайларын ол чаңгыстап тиилеп-ле турган. Ооң кол сорулгазы Иерусалимни тиилеп алыры турган. Ынчалза-даа Иерусалимни Иегова камгалап турар деп, Сеннахирим билбээн.

Иуданың хааны Эзекия Сеннахиримге Иерусалимче халдавас кылдыр эңдере акша төлеп берген. Сеннахирим акшаны алгаш-даа, дөмей-ле Иерусалимче күштүг аг-шериин чоргузупкан. Хоорайда улус аажок коргуп эгелээн, чүге дизе ассирийжилер чоокшулап-ла олурганнар. Ынчан Эзекия улузунга мынча дээн: «Кортпаңар. Ассирийжилер күштүг, ынчалза-даа Иегова-биле оон-даа күштүг бис!»

Сеннахирим Иерусалимче, чонну кочулап, куду көрзүн дээш, айбычызын чоргузупкан. Айбычы хоорай чанынга туруп алгаш: «Иегова силерге дузалап шыдавас! Эзекия силерни мегелеп турар. Кандыг-даа бурган силерни камгалавас» — дээн.

Эзекия Иеговадан чүнү кылырын айтырган. Иегова аңаа: «Сеннахиримниң айбычызының сөстеринден кортпа. Сеннахирим Иерусалимни эжелевес» — дээн. Соонда Эзекия Сеннахиримден каш чагаа алган. Ында мынча дээн: «Дүжүп бер. Иегова сени дөмей камгалавас». Эзекия Бурганга: «Сени шупту улус чаңгыс алыс шын Бурган деп билип аар кылдыр бисти камгалап көрем, Бурганым Иегова» — деп мөргүп эгелээн. Иегова аңаа: «Ассирияның хааны Иерусалимче кирбес. Мен хоорайымны бодум камгалаар мен» — деп харыылаан.

Сеннахирим Иерусалимни тиилеп алыр мен деп дыка бүзүреп турган. Ынчалза-даа ол кежээ Иегова ангелин ассирийжилерниң турлаанче чоргузуптарга, ол 185 000 кижини өлүрүп каан!  Сеннахирим күштүг-шыырак улузун чидирип алган. Ол бак атка киргеш, чана берген. Иегова аазаашкынынга ээ болуп, Эзекия биле Иерусалимни камгалаан. Сен ол үеде аңаа чурттап турган болзуңза, Иеговага ынаныр сен бе?