IRUẸMWI 56
E Josaia Keghi Hoẹmwẹ Uhi Ọghe Osanobua
Ukpo erẹnrẹn ẹre Josaia ghaa ye vbe ọ rri ọba yan otọ e Juda. Uyinmwẹ imamase kevbe ọghe igẹbọ ẹre ọ wa gua emwa obọ ro vbe ẹghẹ nii. Vbe Josaia ghi rre ukpo 16, ọ na gha hoo ne ọ rẹn odẹ nọ khẹke ne irẹn gha ya ga e Jehova. Vbe ọ ghi rre ukpo 20, ọ na suẹn gha guọghọ avbe ẹbọ kevbe avbe aka izọese ni rre otọ e Juda. Vbe ọ ghi rre ukpo 26, irẹn keghi ru emwamwa na ya dọlọ ọgua Osa yi.
Ogiohẹn ighẹ Hilkaia keghi miẹn ebe na kiri ọghe Uhi ọghe Jehova vbe ọgua Osa—egbọre ebe na kiri ne Mosis tobọre gbẹn ẹre na khin. Ọgbenbe ighẹ e Siafan keghi tie ebe Uhi na, ma e Josaia vbe urhu nọ lae. Vbe Josaia ghi họn ẹmwẹ ne ọ tiere, ọ na do bẹghe ẹre wẹẹ, Ivbi e Juda ma gha lele uhi ọghe Jehova vbe ọwara ukpo nibun. Ọba e Josaia keghi tama Hilkaia wẹẹ: ‘E Jehova wa mu ohu ima nia. Lahọ gu ima ya nọ e Jehova emwi nọ khẹke ne ima ru.’ Okhuo ọkpa na tie ẹre Hulda nọ re akhasẹ, ẹre Jehova ghi loo ya tama iran wẹẹ: ‘Ivbi e Juda mianmian mwẹ nẹ. I gha rri iran oya, sokpan ẹi re ẹghẹ na, ne Josaia ya kha, rhunmwuda ọmwa imuegberriotọ ẹre nọ.’
Vbe Ọba e Josaia ghi họn igiuhunmwu na, ọ na si Ivbi e Juda hia koko vbe ọgua Osa. Ọ na tie ebe Uhi ọghe Jehova ma iran hia. E Josaia kevbe emwa rẹn keghi ru eyan ma e Jehova wẹẹ, iran gha ya ekhọe hia họn ẹmwẹ nẹ.
Ẹi ghi re eban Ivbi e Juda ghi do Ugie Alagberra sẹ. Sokpan vbe Josaia ghi tie ẹre vbe ebe Uhi wẹẹ, te ọ khẹke na gha do Ugie Alagberra vbe
ukpo ukpo, ọ na ghi tama emwa rẹn wẹẹ: ‘Ma gha do Ugie Alagberra gie Jehova vbe ukpo na.’ E Josaia na ghi ru emwamwa ọghe vbene iran khian ya ru izọese nibun hẹ; ọ na vbe ru emwamwa ọghe emwa ni khian gha so ihuan vbe ọgua Osa. Vbe Ivbi e Juda ghi do Ugie Alagberra nẹ, iran na do ya ikpẹdẹ ihinrọn do Ugie Ebrẹdi Nọ Ma Hue. Ke ne Samuẹl ya wu, a ma he do Ugie Alagberra vbenia ẹdẹ. Ọ vẹ na rẹn wẹẹ, te Josaia gele wa hoẹmwẹ Uhi ọghe Osanobua. Uwẹ hoo ne u gha ruẹ vbekpae Jehova ra?“Ukpa ne ọ ma mwẹ odẹ ọre ẹmwẹ ruẹn khin, kevbe uwanmwẹ ne ọ rre odẹ mwẹ.”—Psalm 119:105