Yosiya akhali na pyaka pisere mudakhala iye mambo wa Yuda. Mu ndzidzi unoyu anthu akhacita pya masalapita na kulambira madzimunthu. Pikhali Yosiya na pyaka 16, iye apfundzisa mbumba toera kulambira Yahova munjira yakutawirika. Na pyaka 20, iye atoma kufudza madzimunthu na maguwa akhagumanika mu Yuda. Pikhali iye na pyaka 26 pyakubalwa, iye acita masasanyiro toera templo ya Yahova isasanyirwe.

Nyantsembe Wankulu Helkiya agumana mpukutu wa Mwambo wa Yahova. Panango mpukutu unoyu ukhadalembwa na Mose. Mulembi wa mambo akhacemerwa Safani, aenda kapasa Yosiya mpukutu wa Mwambo, mbatoma kuuleri mwakugaluza. Mukhabvesera Yosiya, iye adzindikira kuti mbumba ikhadasiya kutumikira Yahova mu pyaka pizinji. Mambo Yosiya apanga Helkiya: ‘Yahova aipirwa kakamwe na ife. Ndoko ukalonge na iye toera atipange pinafunika ife kucita.’ Yahova atawira kubulukira kuna mprofeta wankazi akhacemerwa Huda: ‘Mbumba ya Yuda yasiya kundibvera. Ndinadzaatcunyusa, mbwenye pyenepi nee pinadzacitika mu utongi wa Yosiya, thangwi iye acepeseka.’

Mambo Yosiya pidabva iye mphangwa zenezi, aenda ku templo mbacemeresa mbumba ya Yuda toera agumanyikane. Buluka penepo, iye aleri Mwambo wa Yahova mwakugaluza kuna mbumba yonsene. Yosiya na mbumba apikira kuti analambira Yahova na ntima wawo onsene.

 Mbumba ya Yuda nee ikhakumbuka Paskwa mu pyaka pizinji. Mbwenye pidaleri Yosiya Mwambo mbaona kuti Paskwa ikhafunika kukumbukirwa pyaka pyonsene, iye apanga mbumba: ‘Tinadzakumbuka Paskwa ya Yahova.’ Buluka penepo, Yosiya akhunganyika toera kupereka ntsembe zizinji, pontho aikha mu templo nsoka wakuimba nyimbo. Mbumba yakumbuka Paskwa, buluka penepo acita Phwando ya Mikate Yakukhonda Kutupiswa mu ntsiku zinomwe. Nee kwaoneka Paskwa ninga ineyi kubulukira mu ntsiku za Samweli. Mwandimomwene, Yosiya akhafuna Mwambo wa Mulungu. Iwembo usakomerwa kupfundza mwambo wa Yahova?