Josíaseʼ káaj u reinar tu luʼumil Judá le yaan ocho años tiʼoʼ. Teʼ kʼiinoʼob jeʼeloʼ le máakoʼoboʼ suuk kaʼach u meyajtiʼob magia yéetel ku adorartikoʼob beetbil diosoʼob. Le yaan 16 años tiʼoʼ, Josíaseʼ taakchaj u adorartik Jéeoba jeʼex unaj u beetaʼaloʼ. Ka tu tsʼáaj 20 años tiʼeʼ, káaj u xuʼulsik le beetbil diosoʼob yéetel le altaroʼob yanoʼob tiʼ tuláakal u luʼumil Judaoʼ. Tsʼoʼoleʼ ka tu tsʼáaj 26 años tiʼeʼ, joʼopʼ u yilik bix jeʼel u yutskíintik u templo Jéeobaeʼ.

Hilquías, u nojchil le sacerdoteʼoboʼ, tu kaxtaj teʼ templo u rolloil u Ley Diosoʼ. Maʼ xaaneʼ letiʼe rollo tu tsʼíibtaj Moisesoʼ. Safán, u secretario le reyoʼ, tu bisaj tiʼ Josías le rollooʼ ka joʼopʼ u kʼaʼam xokik u yuʼube. Ka tu yuʼubaj Josías le baʼax táan u xoʼokloʼ tu tsʼáaj cuentaeʼ tsʼoʼok u máan yaʼab años maʼ táan u beetik le kaaj baʼax ku yaʼalik Jéeobaoʼ. Le rey Josías túunoʼ tu yaʼalaj tiʼ Hilquías: ‹Jéeobaeʼ pʼujaʼan t-éetel. Tʼaanen tu yéetel utiaʼal ka u yaʼaltoʼon baʼax unaj k-beetik›. Jéeobaeʼ tu yaʼalaj tiʼ Huldá, le profetisa, ka u yaʼal lelaʼ: ‹U kajnáaliloʼob Judaeʼ tsʼoʼok u pʼatkenoʼob. Yaan in castigartikoʼob, chéen baʼaleʼ maʼ ken in beet le táan u beetik u reyil Josíasoʼ, tumen letiʼeʼ kabal u yóol›.

Le ka tu yuʼubaj rey Josías lelaʼ, bin teʼ templooʼ ka tu muchʼkíintaj u kajnáaliloʼob Judá. Ka tsʼoʼokeʼ tu kʼaʼam xokaj u Ley Dios tu táan le kaajoʼ. Josías yéetel le kaajoʼ tu yaʼaloʼob yaan u beetkoʼob baʼax ku yaʼalik Dios yéetel tuláakal u puksiʼikʼaloʼob.

 Tsʼoʼok kaʼach u máan yaʼab años maʼ kʼiinbesaʼak le Pascua tumen u kajnáaliloʼob Judaoʼ. Chéen baʼaleʼ Josíaseʼ tu xokaj teʼ Ley unaj u kʼiinbesaʼal cada añooʼ, le oʼolal tu yaʼalaj tiʼ le kaajoʼ: ‹Yaan k-kʼiinbeskeʼex le Pascua utiaʼal Jéeobaoʼ›. Ka tsʼoʼokeʼ Josíaseʼ tu yaʼalaj ka taasaʼak kʼubbil yaʼab kíimsbil baʼalcheʼob yéetel ka yanak junmúuchʼ máakoʼob utiaʼal ka kʼaaynakoʼob teʼ templooʼ. Ka túun tu kʼiinbesoʼob le Pascuaoʼ, ka tsʼoʼokeʼ tu beetoʼob u Kʼiinbesajil le Waajoʼob x-maʼ Levadurailoʼ, lelaʼ xáanchaj siete kʼiinoʼob. Desde ka kíim Samueleʼ, mix juntéen kʼiinbesaʼak junpʼéel Pascua beyaʼ. Josíaseʼ jach tu jaajil u yaabiltmaj kaʼach u Ley Dios. Kux túun teech, ¿uts wa ta tʼaan a kaanbal tiʼ Jéeoba?