NÍ KASEMI 57
Yehowa Tsɔ Yeremia Ke E Ya Fiɛɛ
Yehowa pee Yeremia gbalɔ ngɛ Yuda. E de Yeremia ke e fiɛɛ kɛ tsɔɔ Yuda bi ɔmɛ, nɛ e bɔ mɛ kɔkɔ kaa e sa nɛ a kpa ní yayahi nɛ a ngɛ pee ɔ. Yeremia de Yehowa ke: ‘Yehowa, jokuɛ ji mi. I li bɔ nɛ i kɛ ma mi bi ɔmɛ maa tu munyu ha.’ Yehowa de lɛ ke: ‘Koo ye gbeye. Ma tsɔɔ mo nɔ́ nɛ o ma de. Ma ye bua mo.’
Yehowa de Yeremia ke e bua nikɔtɔmahi nɛ a ngɛ ma a mi ɔ a nya, konɛ e ywia buɛ ko ngɛ a hɛ mi, nɛ e de mɛ ke: ‘Kikɛ nɛ a ma kpata Yerusalɛm hɛ mi ɔ nɛ.’ Benɛ Yeremia pee nɔ́ nɛ Yehowa de lɛ ɔ, nikɔtɔma amɛ a mi mi fu wawɛɛ. Osɔfo ko nɛ a tsɛɛ lɛ ke Pashur ɔ kongo Yeremia, nɛ e ha nɛ a bɔ lɛ pã. Nyɔ ɔ mi tsuo ɔ, Yeremia nyɛ we nɛ e plɛ e he po. Benɛ je na nɛ Pashur ha nɛ a pɛne lɛ ɔ, Yeremia de ke: ‘I be nyɛe ma hi nɔ́ nae kikɛ nɛ ɔ. Ma kpa fiɛɛmi.’ Se anɛ e kpa fiɛɛmi niinɛ lo? Dɛbi. Benɛ Yeremia susu níhi a he wawɛɛ ɔ, e de ke: ‘Yehowa sɛ gbi ɔ ngɛ kaa la nɛ ngɛ tsoe ngɛ ye mi. I be nyɛe ma kpa fiɛɛmi.’ Yeremia ya nɔ nɛ e bɔ ni ɔmɛ kɔkɔ.
Jeha komɛ a se ɔ, matsɛ ehe ba ye Yuda nɔ. Osɔfo ɔmɛ kɛ lakpa gbali ɔmɛ a bua jɔɛ sɛ gbi nɛ Yeremia ngɛ fiɛɛe ɔ he. A de ma nikɔtɔma amɛ ke: ‘E sa kaa nyumu nɛ ɔ nɛ gbo.’ Yeremia de mɛ ke: ‘Ke nyɛ gbe mi ɔ, lɛɛ nyɛ gbe nɔ ko nɛ e pee we yayami ko. Yehowa sɛ gbi nɛ i fiɛɛɔ, pi imi nitsɛ ye nɔ́.’ Benɛ nikɔtɔma amɛ nu nɔ́ nɛ Yeremia de ɔ, a de ke: ‘E sɛ nɛ waa gbe nyumu nɛ ɔ.’
Yeremia ya nɔ nɛ e fiɛɛ, nɛ nikɔtɔma amɛ a mi mi fu wawɛɛ. A de matsɛ ɔ ke é gbe Yeremia. Matsɛ ɔ de mɛ ke a ma nyɛ maa pee Yeremia nɔ́ fɛɛ nɔ́ nɛ a suɔ. A nu Yeremia, nɛ a ngɔ lɛ kɛ wo vu ko nɛ e mi kuɔ, nɛ mɔsɔ ngɛ mi ɔ mi, konɛ e gbo ngɛ lejɛ ɔ. Yeremia bɔni mumi ngɛ mɔsɔ ɔ mi.
Kɛkɛ nɛ ma nɔkɔtɔma ko nɛ e tsuɔ ní ngɛ matsɛ we ɔ nɛ a tsɛɛ lɛ ke Ebɛdmɛlɛk ɔ ya de matsɛ ɔ ke: ‘Nikɔtɔma amɛ nu Yeremia kɛ wo vu ko mi! Ke wa si lɛ ngɛ lejɛ ɔ, e ma gbo.’ Matsɛ ɔ de Ebɛdmɛlɛk ke e ngɔ nyumuhi 30 kɛ piɛɛ e he nɛ a ya je Yeremia ngɛ vu ɔ mi. Yeremia ha we nɛ nɔ́ ko nɛ tsi e nya nɛ e kpa fiɛɛmi. Anɛ e sɛ kaa waa kase lɛ lo?
“Ye biɛ ɔ he je ɔ, nihi tsuo maa nyɛ nyɛ, se nɔ nɛ e ma fĩ si kɛ ya si nyagbe ɔ, a ma he e yi wami.”—Mateo 10:22
Eko ɔ, O Bua Maa Jɔ Enɛ ɔ Hu He
TSƆƆ O BIMƐ NÍ
Yeremia Kpa We Yehowa He Munyu Tumi
E ngɛ mi kaa nihi mi mi fu Yeremia nɛ a ye e he fɛu mohu, se mɛni heje nɛ e ya nɔ nɛ e tu Mawu he munyu ɔ?
BAIBLO MI WOMI HE VIDEOHI
Yeremia Womi ɔ He Video
E ngɛ mi kaa Yeremia kɛ si himihi nɛ a mi wa kpe, se e ngmɛɛ we ní tsumi nɛ a kɛ wo e dɛ kaa gbalɔ ɔ he. Bɔ nɛ e pee e ní ha a ji nɔ hyɛmi nɔ́ kpakpa kɛ ha Kristofohi mwɔnɛ ɔ.
