Jeremías chacharuw Jehová Diosajj Judá oraqen profetäñapatak ajllïna. Jeremiasajj uka markankirinakaruw predicañapäna, jan walinak jaytapjjañapatakiw ewjjañaparakïna. Ukampis Jeremiasajj akham sänwa: ‘Nayajj wawäsktwa, janiw jaqenak nayraqatan parlañsa yatkti’ sasa. Jehová Diosajj sarakïnwa: ‘Jan ajjsaramti, nayaw yanapäma, nayaw kamsasas predicañama uk yatiyaskäma’ sasa.

Diosan mayitaparjamajja Jeremiasajj markan jilïr irpirinakapar tantachthapisajj jupanak nayraqatanwa ñeqʼet lurata mä jarra tʼunjañapäna, ukat akham sañaparakïnwa: ‘Jerusalenajj ukham tʼunjatäniwa’ sasa. Jeremiasajj ukham luräna ukhajja, jilïr irpirinakajj wal colerasipjjäna. Yamas Pasjur sat mä sacerdotejj Jeremiasar nuwjänwa, cepo sat pʼiyanakani tablanakaruw amparanakapampi kayunakapampi achuntayäna. Jeremiasajj arum paqaraw jan onjjtañ puedkänti. Qhepüruw Pasjur sacerdotejj antutjjäna. Jeremiasajj akham sänwa: ‘Janiw aguantirjamäjjti. Janiw predicjjäti’ sasa. ¿Cheqapunit jan predicjjpachäna? Sum amuytʼasisajj sänwa: ‘Jehová Diosan arunakapajj ninjamaw chuymajan nakhitu. Janiw amuktʼkiristti, predicaskakïwa’ sasa. Ukatwa Jeremiasajj yatiyaskakïna.

Walja maranakatjja, yaqha reyiw Judá mark apnaqjjäna. Sacerdotenakarusa falso profetanakarusa Jeremiasan yatiyäwipajj janiw gustkänti. Ukatwa príncipe sat jilïr jaqenakar akham sapjjäna: ‘Aka jaqejj jiwañapawa’ sasa. Jeremiasajj sarakïnwa: ‘Jiwayapjjetätajja, jan juchani jaqeruw jiwayapjjäta. Nayajj kuntï Jehová Diosajj siskitu ukakwa yatiytjja, janiw kuntï nayajj munkta uk yatiykti’ sasa. Uk istʼasasti principenakajj akham sapjjänwa: ‘Janiw aka jaqen jiwañapajj wakiskiti’ sasa.

 Jeremiasajj predicaskakïnwa, ukatwa principenakajj wal colerasipjjäna, Jeremiasar jiwayañapatakiw reyir mayipjjarakïna. Reyisti ‘kuntï munapkta uk lurasipkakim’ sasaw säna. Ukatwa jiwañapatakejj katuntasin mä pozor jaqontapjjäna, ukajj wali manqha, ñeqʼe ukhamänwa. Jukʼat jukʼatwa Jeremiasajj ñeqʼer chhaqantaskäna.

Uk istʼasasti, palacion serviri Ébed-Mélec sat jilïr jaqejj reyir akham sänwa: ‘Principenakajj mä pozoruw Jeremiasar jaqontapjje. Jan apskañänejj jiwaniwa’ sasa. Ukatwa reyejj Ébed-Mélec chachar akham säna: ‘30 chachanak irpasim, Jeremiasar uka pozot apsunipjjam’ sasa. Kunas kunäskpan Jeremiasajj predicaskakïnwa. ¿Janit jupjamäñ munkasma?