Pinili ni Jehova si Jeremias na magin propeta sa Juda. Sinabihan niya ini na hulitan an mga tawo asin patanidan na pumundo na sa paggibo nin maraot. Nagsabi si Jeremias: ‘Pero Jehova, aki pa po ako. Dai ako tataong magtaram sa mga tawo.’ Sinabi ni Jehova: ‘Dai ka matakot. Sasabihon ko saimo an mga itataram mo. Tatabangan taka.’

Sinabi ni Jehova ki Jeremias na tiripunon an kamagurangan na lalaki kan banwaan, tapos pasaon sa atubangan ninda an sarong tapayan, asin magsabi: ‘Arog kaini an mangyayari sa Jerusalem.’ Kan gibuhon ini ni Jeremias, angguton * saiya an kamagurangan. Kinulgan si Jeremias kan saserdoteng si Pasur asin ipinabugtak siya sa sarong pandog na kahoy na ginagamit para ipiton an mga bitis, kamot, saka liog. Magdamlag na dai nakahiro si Jeremias. Kinaagahan, binutasan na siya ni Pasur. Nagsabi si Jeremias: ‘Dai ko na ini kaya. Mapundo na ako sa paghulit.’ Pero nagpundo daw talaga siya? Dai. Kan inisip-isip pa niya iyan, nagsabi siya: ‘An mensahe ni Jehova garo naglalaad na kalayo sa laog ko. Dai ko mapugulan na dai iyan sabihon sa iba.’ Nagpadagos si Jeremias sa pagpatanid sa mga tawo.

Paglihis nin mga taon, nagkaigwa nin bagong hadi sa Juda. Ikinaanggot kan mga saserdote asin kan mga bakong tunay na propeta an mensahe ni Jeremias. Sinabi ninda sa mga prinsipe: ‘Dapat gadanon an tawong ini.’ Nagsabi si Jeremias: ‘Pag ginadan nindo ako, magadan kamo nin tawong daing sála. An itinataram ko bakong hali sako, kundi ki Jehova.’ Kan madangog iyan kan mga prinsipe, nagsarabi sinda: ‘Dai siya dapat gadanon.’

 Padagos na naghulit si Jeremias kaya angguton an mga prinsipe. Nakiulay sinda sa hadi na ipagadan si Jeremias. Sinabi kan hadi na puwede nindang gibuhon ki Jeremias an ano man na gusto ninda. Kaya ihinulog ninda si Jeremias sa hararom saka malaboy * na bubon para magadan. Nagpuon na maglubog sa laboy si Jeremias.

Dangan, an opisyal sa palasyo na si Ebed-melec nagsabi sa hadi: ‘Ihinulog kan mga prinsipe si Jeremias sa bubon! Magagadan siya duman pag pinabayaan ta.’ Sinabi kan hadi ki Ebed-melec na mag-iba nin 30 lalaki asin hawason si Jeremias sa bubon. Bako daw na dapat tang arugon si Jeremias na dai nagpundo sa paghuhulit ano man an mangyari?