Yehova asalile Yeremia ukuba kasesema ku baYuda. Amwebele ukulashimikila abantu no kubasoka ukuti baleke ukucita ifyabipa. Lelo Yeremia atile: ‘Mwe Yehova, ndi mwaice. Nshaishiba ifya kulanda na bantu.’ Lelo Yehova amwebele ati: ‘Witiina. Nkakweba ifya kulanda. Nkakwafwa.’

Yehova aebele Yeremia ukulonganika abakalamba, no kutoba umutondo ninshi balemonako, no kubeba ati: ‘Ifi fine e fyo na Yerusalemu ikatobaulwa.’ Ilyo Yeremia acitile ifyo Yehova amwebele, abakalamba balifulilwe nga nshi. Shimapepo Pashihuri alyumine Yeremia kabili alimukakiile amolu na maboko. Ubushiku bonse Yeremia ali fye apo pene bamukakiile. Ubushiku bwakonkelepo ulucelo Pashihuri alimukakwile. Yeremia atile: ‘Capwa, naleka ukubila ku bantu.’ Lelo bushe alilekele ukubila? Awe. Ilyo Yeremia atontonkenyepo sana, alandile ati: ‘Imbila ya kwa Yehova ili kwati mulilo mu mubili wandi. Te kuti ndeke ukubila.’ E ico Yeremia alitwalilile ukusoka abantu.

Ilyo papitile imyaka iingi, mu Yuda mwaishileba imfumu iipya. Bashimapepo na bakasesema wa bufi balipatile imbila iyo Yeremia alebila. E ico baebele bacilolo ati: ‘Uyu muntu alingile ukufwa.’ Lelo Yeremia abebele ati: ‘Nga mwanjipaya, ninshi mwalaipaya fye umuntu uwabula umulandu. Amashiwi nanda ya kwa Yehova te mashiwi yandi iyo.’ Ilyo bacilolo baumfwile ifi, balandile abati: ‘Uyu muntu talingile ukufwa.’

 Yeremia alitwalilile ukubila amashiwi ya kwa Lesa, kabili bacilolo balifulilwe nga nshi. E ico baebele imfumu ukuti ibasuminishe ukwipaya Yeremia. Imfumu yabebele ukuti bacite fyonse ifyo balefwaya ukucita Yeremia. E ico basendele Yeremia no kumupoosa mu cishima icashika umwali amatipa, balemona ukuti ali no kufwila mu cishima. Awe e fyo Yeremia atendeke ukwibila mu matipa.

Pa numa Ebede-meleke uwali umubomfi wa mfumu aebele imfumu ati: ‘Bacilolo nabapoosa Yeremia mu cishima! Nga tatwamufumye alafwa.’ E ico imfumu yaebele Ebede-meleke ukuya na baume 30 ku kufumya Yeremia mu cishima. Na ifwe tulingile ukuba nga Yeremia uushalekele icintu nangu cimo calenga aleka ukubila amashiwi ya kwa Lesa!