Jehova i jusum Jeremaea blong i talemaot tok blong hem long ol man Juda. Jeremaea i mas prij long ol man, mo givim woning long olgeta se oli mas lego ol rabis fasin. Be Jeremaea i talem se: ‘Jehova, mi mi yangfala nomo. Mi no naf blong toktok long ol man.’ Jehova i talem se: ‘Yu no fraet. Mi bae mi givim toktok long yu blong talemaot long olgeta. Bae mi givhan long yu.’

Jehova i talem long Jeremaea blong i singaot ol elda oli kam wanples, mo i smasem wan graonpot long fored blong olgeta, mo hem i mas talem se: ‘Long sem fasin, bae Jehova i smasem Jerusalem.’ Jeremaea i mekem samting ya, nao ol elda oli kros tumas. Wan pris we nem blong hem Pasuru, i wipim Jeremaea mo i fasemtaet tufala han mo tufala leg blong hem. Blong fulnaet, Jeremaea i no save muv. Long nekis moning, Pasuru i letem hem i gofri. Nao Jeremaea i talem se: ‘!I naf nao! !Bae mi no moa prij!’ ?Be i tru se hem i no moa prij? Nogat. Hem i tingting gud, nao i talem se: ‘Ol tok blong Jehova i stap bon olsem faea long tingting blong mi. Mi mas gohed blong prij, mi no save stop.’ Ale, Jeremaea i gohed blong givim woning long ol man.

Plante yia i pas, nao i gat wan niufala king long Juda. Ol pris mo ol giaman profet oli no laekem nating ol tok we Jeremaea i talemaot. Ol lida oli talem se: ‘!Kilim man ya i ded!’ Be Jeremaea i talem se: ‘Mi mi no mekem wan nogud samting. Sipos yufala i kilim mi mi ded, yufala i mekem i no stret. Mi no stap talemaot ol tok we i kamaot long tingting blong mi, be mi talemaot ol tok blong Jehova.’ Taem ol lida oli harem samting ya, oli talem se: ‘I nogud yumi kilim hem i ded.’

 Ale, Jeremaea i gohed blong prij, be ol lida oli kros yet. Nao oli talem long king se Jeremaea i mas ded. King i talem se oli save mekem long hem olsem oli wantem. Ale, oli tekem Jeremaea, oli sakem hem i go long wan wel we i gat sofmad long hem. Taem Jeremaea i stat draon long sofmad ya, oli ting se bambae hem i ded.

Nao wan man blong wok blong king, nem blong hem Ebedmelek, i talem long king se: ‘!Ol lida oli sakem Jeremaea i go long wan wel! !Sipos yumi lego hem i stap, bae hem i ded!’ King i talem long Ebedmelek blong i tekem sam man oli go pulumaot Jeremaea long wel ya. ?Yu ting se yumi mas gat sem fasin olsem Jeremaea, we i no letem wan samting i blokem hem blong prij?