Yéhôva a nga tobe Jérémie na a bo nkuli mejô asu bôte ya Juda. A nga jô nye na a kañete be, a na, a kate be na ba yiane jô’é mam abé map. Ve Jérémie a nga jô Yéhôva na: ‘A Yéhôva, ke me ngenane mone mongô. Ma yeme ki kobô.’ Ane Yéhôva a nga jô nye na: ‘Te ko woñ. Ma ye kate wo jé wo ye jô. Ma ye volô wo.’

Yéhôva a nga jô Jérémie na a sulane bemvendé, a bôé vie’e mise map, a na, a jô be na: ‘Jérusalem a ye tyamban ane vie’e wu.’ Éyoñe Jérémie a nga bo avale Yéhôva a nga jô, bemvendé be nga wô’ô nye mbia ôlun. Nde pretre éziñ a to jôé na Paschur, a nga bôme Jérémie, a ka’a fe nye ngata’a. Jérémie a nga bo ngumba alu te ngule ya fô’ôsan. Éyoñe tyé é nga lende, Paschur a nga suu nye. Nde Jérémie a nga jô na: ‘Abim ete e yianeya. Ma kañete ki fe.’ Ve, ye a nga telé fo’o ésaé nkañete nga? Momo. Éyoñ Jérémie a nga tu’a fas, a nga su’ulane jô na: ‘Mejô me Yéhôva me ne ane nkaba’a nduan nyôle jam été. Me vo’o telé ésaé nkañete.’ Ane Jérémie a nga kee ésaé jé ôsu.

Mvus abui mimbu, Juda a nga bi mfefé njôô. Bepretre a bivuse bekuli mejô be mbe be vini’i foé Jérémie a mbe a kañete’e. Nde be nga jô bivete na: ‘Môte nyi a yian awu.’ Ane Jérémie a nga jô na: ‘Nge mi wôé ma, mia ye wôé môt a ne te bijô. Ma kañete fo’o ve mejô me Yéhôva, sa ke émam.’ Éyoñe bivet bi nga wô’ô mam a nga jô, be nga jô na: ‘Môte nyi a nji yian awu.’

Jérémie a nga ke ôsu a kañete, a jam ete e nga vindane bivete nlem. Ane be nga jô njô bôte na a wôé nye. Ane njô bôt a nga ve be fili ya bo Jérémie jam ése be mbe be kômbô’ô bo nye. Nde be nga bi Jérémie, a wua nye ébé été asu na a wu. Jérémie ve taté na a nyiin mboto’o été.

Ane mbo ésaé njô bôt a mbe jôé na Ébed-Mélec a nga jô njô bôte na: ‘Bivet bia te wua Jérémie ébé été! Nge bi jô’é nye valé, a zu wu.’ Ane njô bôt a nga jô Ebed-Mélec na a nyoñe bôte 30, be ke vaa Jérémie ébé. Nga bia fe bia yiane vu Jérémie, nnye ate a nji jô’é na jam éziñ é telé ésaé nkañete jé?