Jehovah ama emek Jeremiah ete edi prọfet ke Judah. Enye ama ọdọn̄ Jeremiah ọdọhọ mme owo ẹtre ndinam ndiọi n̄kpọ. Jeremiah ama ọdọhọ Jehovah ete: ‘Ami ndi eyenọwọn̄. Ndiọn̄ọke nte nditịn̄de ikọ ye mmọ.’ Jehovah ama ọdọhọ enye ete: ‘Kûyak idem enyek fi. Nyeteme fi se editịn̄de. Nyan̄wam fi.’

Jehovah ama ọdọhọ Jeremiah okot mbiowo obio, obom aban̄ ke iso mmọ, onyụn̄ ọdọhọ ete: ‘Ntem ke ẹdibom Jerusalem.’ Ke Jeremiah ama akanam emi ama, mbiowo obio ẹma ẹyat esịt etieti ye enye. Oku emi ekekerede Pashhur ama amia enye onyụn̄ anam ẹsịn enye ubọk ye ukot ke ebuka. Ofụri okoneyo oro Jeremiah ikekemeke ndiwọn̄ọde idem. Pashhur ama asana enye ayak edem usen. Jeremiah ama ọdọhọ ete: ‘N̄kemeke ndiyọ utọ n̄kpọ emi aba. Ndikwọrọke ikọ aba.’ Ndi enye ama etre ndikwọrọ ikọ? Iketreke. Ke ini enye eketiede ekere se Abasi ọdọhọde enye ọkwọrọ, enye ama ọdọhọ ete: ‘Ikọ Jehovah asak mi ke esịt nte ikan̄. N̄kemeke nditre ndikwọrọ ikọ.’ Enye ama aka iso ọkwọrọ ete mme owo ẹtre ndiọi n̄kpọ.

Ke ediwak isua ama ekebe, obufa edidem ama ọtọn̄ọ ndikara Judah. Mme oku ye mme prọfet abian̄a ẹma ẹsua ukwọrọikọ Jeremiah etieti, ẹnyụn̄ ẹdọhọ mbọn̄ Judah ẹte: ‘Yak ẹwot ete emi.’ Jeremiah ama ọdọhọ ete: ‘Edieke mbufo ẹwotde mi, mbufo ẹwot owo emi mîduehe. Ntịn̄ke ikọ idemmi, ntịn̄ se Jehovah ọdọn̄de mi.’ Ntre mbọn̄ Judah ẹma ẹdọhọ ẹte: ‘Inyeneke se ete emi eduede, ẹkûwot enye.’

Jeremiah ama aka iso ọkwọrọ ikọ; emi ama anam mbọn̄ Judah  ẹyat esịt etieti ye enye. Mmọ ẹma ẹdọhọ edidem ete ẹwot Jeremiah. Edidem ama ọdọhọ mmọ ẹnam enye se mmọ ẹmade. Mmọ ẹma ẹda enye ẹketop ẹsịn ke obube mmọn̄ emi ọyọhọde ye mbat onyụn̄ otụn̄ọde etieti, ẹte esịne do akpa. Mbat obube oro ama ọtọn̄ọ ndifụk Jeremiah.

Ebed-melech emi akanamde utom ke ufọk edidem ama ọdọhọ edidem ete: ‘Mbọn̄ Judah ẹma ẹmen Jeremiah ẹketop ẹsịn ke obube. Enye ayakpa edieke iyakde enye esịne do.’ Edidem ama ọdọhọ enye ada owo 30 aka okosio Jeremiah ke obube oro. Ọfọn itie nte Jeremiah emi mîkayakke n̄kpọ ndomokiet anam enye etre ndikwọrọ ikọ.