E digitaki Jeremaia o Jiova me nodra parofita na lewe i Juta. E talai koya me vunau vei ira, me vakasalataki ira tale ga mera kua ni cakava na ka ca. E kaya o Jeremaia: ‘Jiova, au se gone. Au sega ni kila na ka meu tukuna vei ira.’ E kaya o Jiova: ‘Kua ni rere. Au na tukuna na ka mo kaya. Au na vukei iko.’

E kaya vei Jeremaia o Jiova me kacivi ira vata na qase, me vorolaka e dua na saqa e matadra, me qai kaya vei ira: ‘Ena vorolaki va qo o Jerusalemi.’ Ni cakava qori o Jeremaia, era cudru sara ga na qase. E qai mokuti koya e dua na bete o Pasuri. Oti e vesuki koya ena ivesu kau, e sega ni yavala rawa kina ena bogi taucoko. E qai sereki koya o Pasuri ena mataka tarava. E kaya o Jeremaia: ‘Au sa sega ni vosota rawa. Meu sa kua ni vunau.’ Vakacava sa soro o Jeremaia? Sega. Ni vakasamataka vinaka tale, e kaya: ‘Na vosa i Jiova e vaka na bukawaqa e lomaqu. Au na sega ni cegu na vunau.’ E tomana o Jeremaia na nona veivakasalataki.

Oti e vica na yabaki sa qai veiliutaki e dua na tui vou e Juta. Era sega ni taleitaka na bete kei ira na parofita lasu na itukutuku e vakasavuya o Jeremaia. Era tukuna vei ira na turaga: ‘Me mate na tamata qo.’ E kaya o Jeremaia: ‘Ke oni vakamatei au, oni sa na vakamatea e dua e sega nona cala. Au tukuna ga na vosa i Jiova, sega ni noqu.’ Nira rogoca qori na turaga, era kaya: ‘Me kua ni vakamatei na tamata qo.’

E vunau tiko ga o Jeremaia. Era  cudru vakalevu na turaga ra qai kerea vua na tui me vakamatei. E tukuna na tui ni rawa nira cakava vua na ka ga era vinakata. Era mani biuti Jeremaia ena dua na qara titobu e tu kina na soso, nira vinakata me mate. E dromu vakamalua o Jeremaia ena soso qori.

E tukuna sara vua na tui e dua na vakailesilesi o Epetimeleki: ‘O ira na turaga era sa biuti Jeremaia ena qara! Ke da biuti koya tu ga e kea, ena mate.’ E mani vakarota na tui me kauta o Epetimeleki e 30 na tagane mera dreti Jeremaia mai na qara. Meda vakataki Jeremaia mada ga, me kua ni dua na ka e vakalatilati ena noda vunau.