REIREI 57
E Kanakoa Ieremia Iehova Bwa E na Uarongorongo
E rinea Ieremia Iehova bwa aia burabeti kaain Iuta. E tuangnga bwa e na uarongorongo nakoia aomata ao n anga te kauring nakoia bwa a riai ni katoki aia mwakuri aika buakaka. E taku Ieremia: ‘Iehova, bon te teei ngai. I kabi n taetae nakoia aomata.’ E taku Iehova nakoina: ‘Tai maaku. N na tuangko te bae ko na taekinna, ao N na buokiko.’
Ao Iehova e tuanga Ieremia bwa e na botiia aia unimwaane aomata, e na ibea te kaatibu i mataia ao e na kangai nakoia: ‘E na ibeaki Ierutarem n aron aei.’ A rangi n un unimwaane ngke e karaoa Ieremia te baere e taekinna Iehova. Ao te ibonga ae Batiura e orea Ieremia ao e kaaki i nanon te bwai ni kabaewae ae karaoaki man te kai. E aki kona ni kammwakuri Ieremia i nanon te tairiki anne ni karokoa ae ngaina, ao e a kaotinakoaki n te ingabong anne irouni Batiura. E taku Ieremia: ‘I a aki konaa uotau. N nang katoka au uarongorongo.’ Ma e koaua bwa e boni bwara nanon teuaei? E aki. Ngke e a manga iangoia riki Ieremia, ao e taku: ‘E a riki ana rongorongo Iehova bwa ai aron te ai ae ura i nanou. I aki kona ni katoka au uarongorongo.’ Ao e teimatoa Ieremia n anga te kauring nakoia aomata.
Imwin ririki aika bati ao e a tautaeka te uea ae boou i Iuta. A rawa ibonga ao burabeti ni kewe ni butimwaea ana rongorongo Ieremia. A taku nakoia tooka: ‘E bon tau ni mate teuaei.’ E taku Ieremia: ‘Ngkana kam kamateai ao kam a kamatea iai te aomata ae akea ana bure. I taekin ana taeka Iehova ao tiaki au taeka.’ Ngke a ongo aei tooka ao a taku: ‘E aki tau ni mate teuaei.’
E teimatoa Ieremia n uarongorongo, ao a a rangi n un tooka. A tuanga te uea bwa e na kamatea Ieremia. E tuangia te uea bwa a kona ni karaoa te bwai ae a kani karaoia nakon Ieremia. Ngaia are a kaira Ieremia ao a karenakoa i nanon te mwarua ae nano ma ni bokaboka, ao a kantaningaia bwa e na mate iai. E a tabe n iinako Ieremia n te bokaboka.
Imwina, ao te mataniwi temanna n te baareti ae arana Ebetamereka e a tuanga te uea ni kangai: ‘A karenakoa Ieremia nako nanon te mwanibwa tooka! Ngkana ti katikua ikekei, ao e na boni mate.’ E tua te uea nakon Ebetamereka bwa e na kairiia 30 mwaane ao ni kaaerakea Ieremia. Tiaki ti bon riai ni kakairi iroun Ieremia ae aki kariaia te bwai teuana bwa e na katoka ana uarongorongo?
“Ane kam na riribaaki irouia aomata ni kabane ibukin arau, ma ane e a tia n nanomwaaka ni karokoa te toki ao e na kamaiuaki.”—Mataio 10:22
Ko Bae Naba n Tangira
REIREINIA NATIMI
E Teimatoa Ieremia n Tataekina Taekan Iehova
E ngae ngke a bwainingarea Ieremia aomata ao n un irouna, ma bukin tera ngke e teimatoa n tataekina taekan te Atua?
TAAMNEI IBUKINI KABWARABWARAANI BOKIN TE BAIBARA
Kabwarabwaraan Ieremia
E teimatoa ni kakaonimaki Ieremia ni mwiokoana ae te burabeti n aki ongei kangaanga. Iangoia bwa tera aron rotakira ngaira Kristian ni boong aikai n ana katoto.
