Jehova wählt de Jeremia als Prophet für Juda us. De Jeremia söll d Lüt go warne und säge, dass si sölled ufhöre, schlimmi Sache z mache. Aber de Jeremia seit: «Jehova, ich bi doch no vil z jung. Ich weiss nid, wie mer mit em Volk redt.» Jehova git ihm zur Antwort: «Muesch kei Angscht ha. Ich säge dir denn scho, was du söllsch säge. Ich hilf dir.»

Später seit Jehova, de Jeremia söll sich mit de Ältischte vom Volk treffe. Vor ihne muess er en Tonchrueg verbreche und ihne erkläre: «Genau eso wird au Jerusalem kaputt gmacht werde.» Wo de Jeremia das macht, werded di Ältischte verruckt. De Prieschter Paschhur haut de Jeremia und tuet sini Händ und sini Füess zwüsche Holzbalke iibschliesse. Di ganz Nacht cha sich de Jeremia nid bewege. Am nöchschte Morge laat ihn de Paschhur denn wider frei. Da seit de Jeremia: «Ich höre mit em Predige uf. Ich halte das nüm us.» Aber hört er würklich uf? Nei. Er überleit sich alles nomal und seit nachher: «D Nachricht vo Jehova brennt wie es Füür i mir. Ich cha gar nid ufhöre vo Jehova z verzelle.» Und denn macht de Jeremia wiiter und tuet s Volk wider warne.

Es vergöhnd es paar Jahr und denn regiert z Juda en neue König. D Prieschter und di falsche Prophete hassed d Nachricht, wo de Jeremia ihne bringt. Si säged zu de Männer, wo d Füehrig hend: «De Maa muess sterbe.» De Jeremia seit: «Wenn ihr mich töted, de töted ihr öpper, wo unschuldig isch. Das, wo ich säge, chunnt vo Jehova und nid vo mir.» Uf das abe beschliessed d Männer, wo d Füehrig hend, dass de Jeremia doch nid muess sterbe.

De Jeremia prediget wiiter. Das macht die Männer verruckt und si bitted de König, er söll de Jeremia umbringe. De König seit, si dörfed mit em Jeremia mache, was si wend. Da packed si de Jeremia und schiessed ihn in en tüüfe Brunne voll Schlamm, wil si wend, dass er dört stirbt. De Jeremia versinkt immer meh im Schlamm.

De Hofbeamti Ebed-Melech gaht zum König und seit: «D Männer, wo d Füehrig hend, hend de Jeremia in en Brunne gheit! Wenn mir ihn dört lönd, denn stirbt er.» De König seit zum Ebed-Melech, er söll 30 Männer mitneh und de Jeremia us em Brunne go zieh. Würklich nüt het de Jeremia bim Predige chönne stoppe. Wetsch du au eso sii wie er?