Jehova wa toorora Jeremia kutja ma rire omuprofete wotjiwaṋa tjaJuda. Eye we mu raera kutja nga zuvarisire ovandu nokuverakiza kutja mave sokuisa okutjita oviṋa ovivi mbi ve tjita. Jeremia wa tja: ‘Muhona Ndjambi ami ngunda owami okaṱiṱi, hi nokutjiwa okuhungira ku notjiwaṋa.’ Jehova wa tja ku ye: ‘O tira. Ami me ku raere avihe mbi mo sokuhungira. Ami me ku vatere.’

Jehova wa raera Jeremia kutja nga woronganise ovanene avehe motjiwaṋa, nu ma nyanyaure otjitjuma tjomunoko momurungu wawo, okuzambo me ve raere kutja, ‘Jerusalem wina otji matji nyanyaurwa nai.’ Indu Jeremia tja tjita otja Jehova pe mu raera, ovanene va pindika tjinene. Omupristeri wena Pashur wa tona Jeremia okuzambo e mu pandeke. Ouṱuku auhe Jeremia kaa yenene okunyinganyinga. Pashur we mu kutura omuhuka mbwa kongorera ko. Jeremia wa tja: ‘Ami hi nokuyenena okuungura oviungura mbi rukwao, me isa okuzuvarisa.’ Nu hapo wa isa okuzuvarisa tjiri? Kako. Indu Jeremia tje ripurira ko rukwao, eye wa tja: ‘Ombuze yaMuhona mai ruruma otjomuriro mu ami. Ami hina ku yenena okuisa okuzuvarisa.’ Jeremia wa kayenda komurungu okurakiza otjiwaṋa.

Pa kapita ozombura ozengi, nu mwa ri ombara ombe moJuda. Ovapristeri novaprofete vovizeze va tondere ombuze yaJeremia. Owo va raera kovanane nave tja: ‘Omurumendu ngwi ma sokuzepewa.’ Jeremia wa tja: ‘Tji mwe ndji zepa, mamu zepa omurumendu omuhinandjo. Omambo ngu mbi hungira kamambo wandje omuini, omambo waJehova.’ Indu ovanane tji va zuva omambo nga, owo va tja: ‘Omurumendu ngwi ke nakusokuzepewa.’

 Jeremia wa kayenda komurungu okuzuvarisa, nu ovanane va pindika tjinene. Owo va ningira ombara kutja ngai zepe Jeremia. Ombara ye ve raera kutja ngave tjite ngamwa atjihe tji mave vanga okutjita ku Jeremia. Owo va kambura Jeremia nave mu yumbu mondjombo ndje urire omunoko amave zeri kutja ma kokere mo. Jeremia wa uta okuṱomwina momunoko.

Okuzambo omukarere wondjuwo youhona wena Ebedmelek wa raera ombara na tja: ‘Ovanane va yumba Jeremia mondjombo! Tji twe mu esa mo, ma koka.’ Ombara ya rakiza Ebedmelek kutja ma toore ovarumendu 30 nu ma kanane Jeremia mondjombo. Hapo katjiṋa otjiwa nao okukara otja Jeremia, ngu ha yandjerere otjiṋa ngamwa atjihe okumutjaera okuzuvarisa?