Pinili ni Jehova ni Jeremias nga agbalin a propeta iti Juda. Imbilinna ken Jeremias a kasabaanna dagiti tattao ken ibagana a masapul nga isardengda dagiti dakes nga aramidda. Kinuna ni Jeremias: ‘Ngem Jehova, maysaak la nga ubing. Diak ammo ti makisarita kadagiti tattao.’ Imbaga ni Jehova: ‘Dika agbuteng. Ibagakto kenka ti ibagam. Tulongankanto.’

Imbilin ni Jehova ken Jeremias a paayabanna dagiti lallakay, mangburak iti karamba iti sanguananda, sa ibagana: ‘Maburakto ti Jerusalem a kas iti daytoy.’ Idi inaramid ni Jeremias ti imbaga ni Jehova, permi ti unget dagiti lallakay. Kinabil isuna ti padi nga agnagan Pasur sa inkabilna iti tul-ong. Nagpatnag a saan a makagaraw ni Jeremias. Kabigatanna, pinalubosan ni Pasur. Imbaga ni Jeremias: ‘Diak kayan. Saanakon a mangasaba.’ Ngem talaga kadi a simmukon? Saan. Idi nagpampanunot, imbagana: ‘Ti mensahe ni Jehova ket kasla apuy iti unegko. Saanak a mabalin nga agsardeng a mangasaba.’ Intultuloy ni Jeremias a kasabaan dagiti tattao.

Kalpasan ti mano a tawen, adda baro nga ari iti Juda. Kagurgura dagiti padi ken dagiti ulbod a propeta ti mensahe ni Jeremias. Imbagada kadagiti prinsipe: ‘Masapul a matay dayta a tao.’ Kinuna ni Jeremias: ‘No patayendak, makabasolkayo gapu ta awan basolko. Naggapu ken Jehova ti ibagbagak, saan a naggapu kaniak.’ Idi nangngeg dayta dagiti prinsipe, imbagada: ‘Awan rason tapno patayentayo daytoy a tao.’

Nagtultuloy a nangasaba ni Jeremias, ket permi ti unget dagiti prinsipe. Imbagada iti ari a masapul  a matay ni Jeremias. Imbaga ti ari a mabalinda nga aramiden ken Jeremias ti aniaman a kayatda. Innalada ni Jeremias ket intapuakda iti nauneg ken napitak a bubon tapno matay. Nangrugi a lumned ni Jeremias iti pitak.

Idi kuan, imbaga ti maysa nga opisial ti palasio a ni Ebed-melec iti ari: ‘Ni Jeremias ket intapuak dagiti prinsipe iti bubon! No baybay-antayo, matay.’ Imbilin ti ari ken Ebed-melec a mangayab iti 30 a lallaki ket iyaonda ni Jeremias. Saan kadi a masapul a tuladentayo ni Jeremias, a di nagsardeng a nangasaba uray naipasango iti narigat a situasion?