ĨSOMO YA 57
Yeova Nĩwamũtũmie Yelemia Akatavanyʼe
Yeova nĩwamũnyuvie Yelemia ethĩwe mwathani kwondũ wa andũ ma Yuta. Amwĩie athi akatavye andũ ma Yuta maũndũ ala wendaa mamanye, na aimakanyʼa nĩ kana maeke kwĩka maũndũ mathũku. Ĩndĩ Yelemia eeie Yeova atĩĩ: ‘Nyie nĩ o kamwana. Ndyĩsĩ ũndũ ndonya kũneena na andũ asu.’ Nake Yeova amũsũngĩie amwĩa: ‘Ndũkakĩe. Nĩngũũtavya kĩla ũũthi kũmatavya, na nĩngũũtetheesya.’
Ĩtina wa ũu, Yeova eeie Yelemia ombanyʼe atumĩa onthe ma Isilaeli, na ayosa mbisũ ya yũmba na aimĩkimanyʼa na nthĩ onthe mene na ayasya atĩĩ: ‘Yelusaleme ĩkaanangwa ta mbisũ ĩsu.’ Yĩla Yelemia weekie ũu wataviwʼe nĩ Yeova, atumĩa ma Isilaeli nĩmeewie woo mũno. Mũthembi ũmwe weetawa Vasuli nĩwamũkũnie Yelemia na amwoveea maaũ mĩtĩnĩ. Yelemia akomie vau nũndũ ndaĩ atonya kũthi. Kwakya Vasuli nĩwamũthaisye. Maũndũ asu mamũkwatie Yelemia matumie asya atĩĩ: ‘Nditonya kũendeea kũmĩĩsya, na ndiendeea kũtavanyʼa.’ Ĩndĩ we Yelemia nĩwaekie vyũ kũthũkũma wĩa ũla Yeova wamũnengete? Aiee. Yĩla Yelemia wasũanĩie mũnango aisye-ĩ: ‘Maũndũ ala Yeova ũndũmĩte ngatavanyʼe nĩ ta mwaki nthĩnĩ wakwa. Ndyĩsa kũeka kũtavanyʼa maũndũ asu.’ Ũu watumie Yelemia aendeea kũkanyʼa andũ.
Myaka mingĩ nĩyavĩtie na mũsumbĩ mweũ ambĩĩa kũsumbĩka ũsumbĩnĩ wa Yuta. Athembi na athani ma ũvũngũ mayendaa o na vanini kwĩwʼa maũndũ ala Yelemia watavanasya. Matavisye anene atĩĩ: ‘Mũndũ ũũ aĩle kũawa.’ Ĩndĩ Yelemia amea: ‘Mwambũaa, mwĩĩthĩwa mwooaa mũndũ ũte na ĩvĩtyo. Nyie nĩneenaa ndeto sya Yeova, ĩndĩ ti syakwa.’ Yĩla anene asu meewie kĩla Yelemia wamatavya, maisye: ‘Mũndũ ũũ ndaĩle kũkwʼa.’
Yelemia nĩwaendeeie kũtavanyʼa na ũu watuma anene mathata mũno. Anene asu meeie mũsumbĩ amũae Yelemia. Nake mũsumbĩ amatavya kana no mamwĩke o ũndũ mekwenda. Kwoou nĩmamwosie Yelemia mamwĩkya kĩthimanĩ kyaĩ kĩliku na kyaĩ na ndaka nĩ kana akwʼĩĩe vo. Yĩla mamwĩkisye, nĩwambĩĩe kũthelekeelya ndakanĩ.
Ĩtina wa ĩvinda ĩnini, mũthũkũmi ũmwe wa Mũsumbĩ weetawa Eveti-meleki eeie mũsumbĩ atĩĩ: ‘Anene nĩmamwĩkisye Yelemia kĩthimanĩ. Twamũeka vau nũkũkwʼa.’ Nĩvo ĩndĩ mũsumbĩ weeie Eveti-meleki ose aũme 30 makamumye Yelemia kĩthimanĩ kĩu. Tyo tũatĩĩe ngelekanyʼo ya Yelemia ũla ũtaaĩtĩkĩlya kĩndũ o na kĩmwe kĩmũsiĩĩe kũtavanyʼa?
“Mũkamenwa nĩ andũ onthe kwondũ wa ĩsyĩtwa yakwa, ĩndĩ ũla ũkomĩĩsya kũvika mũthya, ũsu akatangĩĩwa.”—Mathayo 10:22
No Wendeewʼe Nĩ Ii
MANYĨSYA SYANA SYAKU
Yelemia Ndaaeka Kũtavany’a Ĩũlũ wa Yeova
O na kau andũ nĩmamũthekeeie na mamwĩw’ĩa woo, nĩkĩ Yelemia ũtaaeka kũtavany’a?
VITIO IELEETYE MAVUKU MA MBIVILIA
Maelesyo Ĩũlũ wa Ĩvuku ya Yelemia
O na kau mwathani Yelemia nĩwakomanie na mawetu, nĩwaendeeie na wĩa wake. Sũanĩa ũndũ ngelekanyʼo yake ĩtonya kũtetheesya Aklĩsto ũmũnthĩ.
