Li Jehobʼa kixsikʼ laj Jeremias re naq tkʼanjelaq joʼ propeet saʼ li naʼaj Juda. Kixtaqla naq tixpuktesi li resil rehebʼ li poyanam li wankebʼ aran ut tixye rehebʼ naq teʼxkanabʼ xbʼaanunkil li maaʼusilal. Abʼan laj Jeremias kixye re li Jehobʼa: «Toj saajin, inkʼaʼ ninnaw aatinak chiruhebʼ li poyanam». Li Jehobʼa kixye re: «Matxuwak, laaʼin tintenqʼanq aawe ut tinye aawe li tento taapuktesi».

Li Jehobʼa kixye re laj Jeremias naq tixchʼutubʼ ebʼ li cheekel winq re li tenamit, tixjor jun li chʼochʼ kuk chiruhebʼ ut tixye rehebʼ: «Aʼin ajwiʼ tixkʼul Jerusalen». Naq laj Jeremias kixbʼaanu aʼin, ebʼ li cheekel winq kʼajoʼ naq keʼchalk xjosqʼil. Jun laj tij Pasjur xkʼabʼaʼ kixsakʼ laj Jeremias ut kixnatʼ chiru jun li cheʼ, aʼin naraj xyeebʼal naq kixnatʼ ebʼ li roq ut ebʼ li ruqʼ. Laj Jeremias inkʼaʼ kiruuk rekʼasinkil ribʼ chiru chixjunil li qʼoqyink. Toj wulajaq chik naq kiʼisiik aran xbʼaan laj Pasjur. Tojaʼ naq laj Jeremias kixye: «Inkʼaʼ chik ninkuy. Tinkanabʼ puktesink». Abʼan, ma kixbʼaanu aʼin? Inkʼaʼ. Laj Jeremias kixkʼoxla chiʼus ut kixye: «Li resil li Jehobʼa chanchan lochlokil xaml saʼ linchʼool. Inkʼaʼ naru tinkanabʼ puktesink». Joʼkan naq laj Jeremias inkʼaʼ kixkanabʼ xyeebʼal naq teʼxjal xnaʼlebʼ.

Keʼnumeʼk li chihabʼ, ut jun chik li awabʼej kiʼok chi jolomink Juda. Ebʼ laj tij ut ebʼ li bʼalaqʼil propeet xikʼ nekeʼril chaq li esil li naxpuktesi laj Jeremias. Joʼkan naq keʼxye rehebʼ li xjolomil li tenamit: «Li winq aʼin xkʼulubʼ naq tkamsiiq». Laj Jeremias kixye: «Wi tineekamsi, teekamsi jun li winq li maakʼaʼ xmaak. Laaʼin yal ninye li naxye we li Jehobʼa ut maawaʼ li nachalk saʼ linchʼool». Naq ebʼ li winq keʼrabʼi aʼin, keʼxye: «Li winq aʼin moko xkʼulubʼ ta naq tkamsiiq».

 Laj Jeremias inkʼaʼ kixkanabʼ puktesink, abʼan ebʼ li xjolomil li tenamit kʼajoʼ naq keʼchalk xjosqʼil ut keʼxye re li awabʼej naq tkamsiiq. Li awabʼej kixye rehebʼ naq teʼxbʼaanu re li nekeʼraj. Joʼkan naq keʼxchap ut keʼxkut saʼ jun li jul nujenaq chi sulul re naq tkamq. Timil timil, laj Jeremias kiʼok chi subʼeʼk saʼ li sulul.

Jun laj puubʼ li nakʼanjelak saʼ rochoch li awabʼej, laj Ebed-Melec xkʼabʼaʼ, kixye re li awabʼej: «Ebʼ li winq li nekeʼxjolomi li tenamit keʼxkut saʼ jul laj Jeremias. Wi tqakanabʼ aran, tkamq». Li awabʼej kixye re laj Ebed-Melec naq tixkʼam chirix 30 chi winq re risinkil laj Jeremias saʼ jul. Laj Jeremias maajunwa kixkanabʼ puktesink. Peʼyaal naq taawaj xkʼambʼal aawe rikʼin?