Yehowa ponaka Yeremia na kuvanda profete ya bantu ya Yuda. Yandi songaka Yeremia na kulonga bantu mpi na kukebisa bo nde bo fwete yambula kusala mambu ya mbi. Yeremia tubaka nde: ‘Kansi Yehowa, mono kele leke. Mono me zaba ve kutuba na ntwala ya bantu.’ Yehowa songaka yandi nde: ‘Kuwa ve boma. Mono ta zabisa nge mambu ya nge ta tuba. Mono ta sadisa nge.’

Yehowa songaka Yeremia na kuvukisa bankuluntu, na kupanza dibungu ya ntoto na meso na bo, mpi na kutuba nde: ‘Bo ta panza Yeruzalemi bonso dibungu yai.’ Ntangu Yeremia salaka mambu yina Yehowa tubaka, bankuluntu waka makasi mingi. Nganga-nzambi mosi, zina na yandi Pashure, bulaka Yeremia mpi tulaka yandi na mabaya. Na mpimpa ya mvimba, Yeremia vandaka ve ti mpila ya kutambula. Pashure yambulaka Yeremia na kilumbu yina landaka. Yeremia tubaka nde: ‘Mono ke zola diaka ve nde bo kanga mono mutindu yai. Mono ke yambula kusamuna.’ Keti yandi yambulaka kibeni? Ve. Ntangu Yeremia yindulaka diaka mingi, yandi tubaka nde: ‘Nsangu ya Yehowa kele bonso tiya na kati na mono. Mono lenda yambula ve kusamuna.’ Yeremia landaka kukebisa bantu.

Bamvula lutaka, mpi na nima ntotila ya mpa kumaka kuyala na Yuda. Banganga-nzambi ti baprofete ya luvunu vandaka kumenga nsangu ya Yeremia. Bo tubilaka bamfumu nde: ‘Muntu yai fwete fwa.’ Yeremia tubaka nde: ‘Kana beno fwa mono, beno ta fwa muntu yina me sala ve mambu ya mbi. Mono ke tuba mambu ya Yehowa, kansi ya mono ve.’ Ntangu bamfumu waka mambu yai, bo tubaka nde: ‘Muntu yai fwete fwa ve.’

 Yeremia landaka kusamuna, mpi bamfumu waka makasi mingi. Bo songaka ntotila na kufwa Yeremia. Ntotila tubaka nde bo sala Yeremia mambu yonso yina bo me zola. Bo bakaka Yeremia mpi bo losaka yandi na dibulu mosi ya nda ya poto-poto, mpi bo yindulaka nde yandi ta fwa kuna. Yeremia yantikaka kudinda na poto-poto.

Kansi, nsadi mosi ya nzo ya ntotila, zina na yandi Ebedi-meleki, songaka ntotila nde: ‘Bamfumu me losa Yeremia na dibulu! Kana beto yambula yandi kuna, yandi ta fwa.’ Ntotila songaka Ebedi-meleki na kubaka babakala 30 sambu bo basisa Yeremia na dibulu yina. Keti beto fwete vanda ve bonso Yeremia, yina bikaka ve nde ata kima mosi kukanga yandi nzila ya kusamuna?