Jehova nĩ aathurire Jeremia atuĩke mũnabii wa andũ a Juda. Aamwĩrire amahunjĩrie na amakaanie gwĩka maũndũ moru. Jeremia oigire ũũ: ‘Niĩ ndĩ o mũnini mũno. Ndingĩhota kwaria.’ Nake Jehova akĩmwĩra ũũ: ‘Tiga gwĩtigĩra. Nĩ ngũkwĩra ũrĩa ũkuuga na ngũteithie.’

Jehova eerire Jeremia ete athuri arĩa maatongoragia, acoke oragĩre nyũngũ ya rĩũmba mbere yao na ameere ũũ: ‘Jerusalemu ĩkanangwo o ta nyũngũ ĩno ya rĩũmba.’ Rĩrĩa Jeremia eekire ũrĩa eerĩtwo nĩ Jehova, athuri acio nĩ maarakarire mũno. Mũthĩnjĩri-Ngai ũmwe wetagwo Pashuri nĩ aahũũrire Jeremia na akĩmuoha magũrũ. Ũtukũ ũcio wothe Jeremia ndangĩahotire kuuma harĩa aarĩ. Pashuri aamũrekereirie mũthenya ũyũ ũngĩ rũcinĩ. Jeremia oigire ũũ: ‘Ndingĩhota gũkirĩrĩria rĩngĩ. Ndikũhunjia rĩngĩ!’ No hihi nĩ aatigire? Aca. Rĩrĩa eecũranirie ũndũ ũcio rĩngĩ, oigire ũũ: ‘Ndũmĩrĩri ya Jehova nĩ ta mwaki ũrĩ thĩinĩ wakwa. Ndingĩtiga kũhunjia.’ Jeremia no aathire na mbere kũhe andũ mũkaana.

Thutha wa mĩaka mĩingĩ, nĩ kwagĩire mũthamaki ũngĩ Juda. Athĩnjĩri-Ngai na anabii a maheeni matiakenirio nĩ ndũmĩrĩri ĩrĩa Jeremia aaheanaga. Meerire arangĩri ũũ: ‘Mũndũ ũyũ agĩrĩirũo kũũragwo.’ Nake Jeremia akiuga: ‘Akorũo nĩ mũkũnjũraga, mũkũũraga mũndũ ũtarĩ na mahĩtia. Ndũmĩrĩri ĩrĩa heanaga nĩ ya Jehova no ti yakwa.’ Rĩrĩa arangĩri maaiguire ũhoro ũcio moigire ũũ: ‘Mũndũ ũyũ ndagĩrĩire kũũragwo.’

 Jeremia nĩ aathiire na mbere kũhunjia, na ũndũ ũcio ũkĩrakaria arangĩri acio mũno. Nĩ meerire mũthamaki amũragithie, nake mũthamaki akĩmeera meeke ũrĩa mekwenda nake. Maanyitire Jeremia na makĩmũikia irima irikũ rĩarĩ na ndoro magĩciria atĩ nĩ egũkuĩra ho. Jeremia nĩ aambĩrĩirie gũtonyerera ndoro-inĩ ĩyo.

Mũndũ ũmwe wetagwo Ebedi-meleku warutaga wĩra nyũmba-inĩ ya Mũthamaki nĩ eerire mũthamaki ũũ: ‘Arangĩri nĩ maikirie Jeremia irima. Twamũtiga hau no egũkua.’ Mũthamaki eerire Ebedi-meleku oe andũ 30 athiĩ nao makarute Jeremia irima-inĩ rĩu. Na githĩ tũtikĩagĩrĩirũo gũkorũo tũhaana ta Jeremia, ũrĩa gũtarĩ kĩndũ kĩamũgirĩrĩirie kũhunjia?