Jehova okwa li a hoolola Jeremia a ninge omuprofeti wOvajuda. Okwa li e mu lombwela a udifile ovanhu noku va londwela kutya nava xulife po okulonga owii. Opo nee Jeremia okwa tya: ‘Akutu Jehova, ame omunyasha. Ame kandi shii okupopya.’ Jehova okwa tya kuye: ‘Ino tila, ohandi ke ku lombwela osho u na oku ka popya. Ohandi ku kwafa.’

Jehova okwa lombwela Jeremia a ka ongele ovakulunhu aveshe, ndele ta tatula oshiyuma shedu moipafi yavo, ndele ta ti: ‘Jerusalem nasho otashi ka hanaunwa po ngaho.’ Eshi Jeremia a ninga naanaa ngaashi a lombwelwa kuJehova, ovakulunhu ovo ova li va handuka unene. Omupristeri wedina Pashur okwa denga Jeremia noku mu tula meti. Jeremia ka li ta dulu okulinyenga oufiku aushe. Pashur okwe mu mangulula mo ongula eshi kwasha. Jeremia okwa tya: ‘Itandi dulu vali. Itandi i vali ndi ka udife.’ Ndele mbela okwa li ngoo shili a sholola filufilu? Ahowe. Eshi Jeremia a diladila moule kombinga yaasho, okwa tya: ‘Etumwalaka laJehova ola fa omundilo u li meni lange. Itandi xulifa po okuudifa.’ Jeremia okwa li a twikila okulondwela ovanhu.

Eshi pa pita omido, muJuda omwe ke uya ohamba ipe. Ovapristeri nosho yo ovaprofeti ovanaipupulu ova li ve tonde etumwalaka laJeremia. Ova li va lombwela omalenga tava ti: ‘Omulumenhu ou okwa wana okufya.’ Jeremia okwa tya kuvo: ‘Ngeenge omwa dipaa nge, otamu dipaa omulumenhu ehe na etimba. Ohandi popi eendjovo daJehova, ndele hadange.’ Eshi omalenga e shi uda, okwa tya: ‘Omulumenhu ou ina wana okufya.’

Jeremia okwa li a twikila okuudifa, nomalenga okwa li a handuka neenghono. Opo nee okwa li a pula ohamba i dipae Jeremia. Ohamba oya ti kutya otava dulu okuninga keshe osho va hala okuningila Jeremia. Opo nee ova kufa Jeremia ndele tave mu  umbile mondungu ileile i na eenhata, tava diladila kutya ota file mo. Jeremia okwa li a tameka okuningina monhata.

Opo nee elenga ledina Ebed-Melek ola lombwela ohamba tali ti: ‘Omalenga okwa kupula Jeremia mondungu, nongeenge otwa efa a kale omo, ota ka fya.’ Ohamba oya lombwela Ebed-Melek a kufe ovalumenhu 30 va ka kufe mo Jeremia mondungu. Mbela itatu dulu okukala ngaashi Jeremia, oo ina efa nande osha shi mu efife po okuudifa?