មេរៀនទី៥៧
ព្រះយេហូវ៉ាចាត់យេរេមាឲ្យទៅប្រកាសផ្សាយ
ព្រះយេហូវ៉ាបានជ្រើសរើសយេរេមា ឲ្យធ្វើជាអ្នកប្រកាសទំនាយដល់បណ្ដាជនយូដា។ លោកបង្គាប់គាត់ឲ្យទៅដាស់តឿនបណ្ដាជនឈប់ធ្វើអំពើអាក្រក់ទៀត។ យេរេមាឆ្លើយថា៖ ‹ប៉ុន្តែព្រះយេហូវ៉ា ខ្ញុំនៅក្មេងណាស់។ ខ្ញុំមិនដឹងថាត្រូវនិយាយយ៉ាងណាជាមួយនឹងបណ្ដាជនទេ›។ ព្រះយេហូវ៉ាប្រាប់គាត់ថា៖ ‹កុំភ័យខ្លាចឡើយ។ ខ្ញុំនឹងប្រាប់អ្នកអំពីអ្វីដែលអ្នកត្រូវនិយាយ។ ខ្ញុំនឹងជួយអ្នក›។
ព្រះយេហូវ៉ាបានបង្គាប់យេរេមាឲ្យហៅពួកបុរសចាស់ទុំមកជួបជុំគ្នា រួចឲ្យគាត់វាយបំបែកក្អមនៅចំពោះមុខពួកគេ ហើយប្រាប់ថា៖ ‹ក្រុងយេរូសាឡិមនឹងត្រូវវាយបំបែកដូចក្អមនេះដែរ›។ ពេលយេរេមាធ្វើតាមអ្វីដែលព្រះយេហូវ៉ាបានប្រាប់ ពួកបុរសចាស់ទុំក្ដៅចិត្តណាស់។ សង្ឃម្នាក់ឈ្មោះផាសហឺបានវាយយេរេមា ហើយដាក់ខ្នោះគាត់។ ពេញមួយយប់ យេរេមាមិនអាចរើខ្លួនបានទេ។ លុះព្រឹកឡើង ផាសហឺដោះលែងយេរេមាវិញ។ យេរេមានិយាយថា៖ ‹ខ្ញុំមិនអាចទ្រាំបានទៀតទេ។ ខ្ញុំឈប់ទៅផ្សព្វផ្សាយហើយ›។ ប៉ុន្តែ តើគាត់ពិតជាឈប់ផ្សព្វផ្សាយមែនឬ? អត់ទេ។ ក្រោយពីគិតពិចារណា គាត់បាននិយាយថា៖ ‹ប្រសាសន៍របស់ព្រះយេហូវ៉ាប្រៀបដូចជាភ្លើងនៅក្នុងខ្លួនខ្ញុំ។ ខ្ញុំមិនអាចឈប់ផ្សព្វផ្សាយបានទេ›។ ដូច្នេះ យេរេមាបន្តដាស់តឿនបណ្ដាជនតទៅទៀត។
ច្រើនឆ្នាំកន្លងផុតទៅ ស្រុកយូដាមានស្ដេចថ្មីឡើងគ្រប់គ្រង។ ពួកសង្ឃនិងពួកអ្នកប្រកាសទំនាយក្លែងក្លាយ មិនចូលចិត្តអ្វីដែលយេរេមាប្រកាសផ្សាយទាល់តែសោះ។ ពួកគេប្រាប់ពួកអ្នកគ្រប់គ្រងថា៖ «បុរសនេះសមនឹងស្លាប់»។ យេរេមានិយាយថា៖ ‹បើពួកអ្នកសម្លាប់ខ្ញុំ ពួកអ្នកនឹងសម្លាប់ជនដែលគ្មានកំហុស។ ពីព្រោះខ្ញុំប្រាប់ប្រសាសន៍មកពីព្រះយេហូវ៉ា មិនមែនមកពីខ្ញុំទេ›។ ពេលពួកអ្នកគ្រប់គ្រងឮដូច្នេះ ពួកគេនិយាយថា៖ «បុរសនេះមិនសមនឹងស្លាប់ទេ»។
បន្ទាប់មក យេរេមាបន្តផ្សព្វផ្សាយទៀត។ ពេលនេះ ពួកអ្នកគ្រប់គ្រងខឹងខ្លាំងណាស់។ ពួកគេបានទៅសុំស្ដេចឲ្យប្រហារជីវិតយេរេមា។ ស្ដេចអនុញ្ញាតឲ្យពួកគេធ្វើតាមចិត្ត។ ដូច្នេះ ពួកគេបានចាប់យេរេមា រួចទម្លាក់គាត់ទៅក្នុងអណ្ដូងភក់ដ៏ជ្រៅ ដោយគិតថាគាត់នឹងស្លាប់នៅក្នុងអណ្ដូងនោះ។ យេរេមាលិចបន្តិចម្ដងៗទៅក្នុងភក់។
រួចមក មានបុរសម្នាក់ឈ្មោះអ៊ីបេតមេលេក ដែលជាមន្ត្រីក្នុងវិមានស្ដេច បានជម្រាបស្ដេចថា៖ ‹ពួកអ្នកគ្រប់គ្រងបានបោះយេរេមាទៅក្នុងអណ្ដូង! បើយើងទុកគាត់ឲ្យនៅបែបនេះ គាត់មុខជាស្លាប់មិនខាន›។ ហេតុនេះ ស្ដេចបញ្ជាអ៊ីបេតមេលេកឲ្យនាំបុរស៣០នាក់ ទៅយោងយេរេមាចេញពីអណ្ដូងដ៏ជ្រៅ។ ដូចគំរូយេរេមា យើងគួរបន្តផ្សព្វផ្សាយ ទោះជាមានអ្វីកើតឡើងក៏ដោយ មែនទេ?
«មនុស្សទាំងអស់នឹងស្អប់អ្នករាល់គ្នាដោយសារអ្នកកាន់តាមខ្ញុំ។ ប៉ុន្តែ អ្នកណាដែលស៊ូទ្រាំរហូតដល់ទីបញ្ចប់ អ្នកនោះនឹងត្រូវសង្គ្រោះ»។—ម៉ាថាយ ១០:២២
លោកអ្នកក៏ប្រហែលជាចូលចិត្តដែរ
ចូរបង្រៀនកូនរបស់អ្នក
យេរេមាមិនបានឈប់និយាយអំពីព្រះយេហូវ៉ា
ទោះជាមនុស្សសើចចំអកដាក់យេរេមានិងខឹងគាត់ក៏ដោយ ហេតុអ្វីគាត់មិនបានឈប់និយាយអំពីព្រះ?
វីដេអូអំពីគោលសំខាន់ពីសៀវភៅក្នុងគម្ពីរ
គោលសំខាន់ពីសៀវភៅយេរេមា
យេរេមាបានបន្តភារកិច្ចរបស់គាត់ជាអ្នកប្រកាសទំនាយទោះជាមានការពិបាកយ៉ាងខ្លាំងក្ដី។ សូមគិតអំពីមេរៀនដែលគ្រិស្តសាសនិកសព្វថ្ងៃនេះអាចទាញពីគំរូរបស់គាត់។
