DISÁ 57
Jihova ua Tumikisa Jelemiia Phala Kuboka
Jihova ua solo Jelemiia phala kukala polofeta mu ixi ia Judá. Muéne ua mu tumu kubokela o mundu ni ku a dimuna phala ka bhange dingi o ima ia iibha. Jelemiia uambe: ‘Jihova tata, eme ngi mona-ndenge hanji. Ki ngijiia kuzuela ni athu.’ Jihova ua mu tangela: ‘Kana kukala ni uôma. Nga-nda ku tangela o ima i ua-nda zuela. Nga-nda ku kuatekesa.’
Jihova ua tumina Jelemiia kubhongolola o adiakime, ni kubula kitutu kia utuma bhu pholo iâ. Jelemiia uixi: ‘Jeluzaleme a-nda i bula kala ngi ka bulu o kitutu kiki.’ Kioso Jelemiia kia bhange kia mu tangela Jihova, o adiakime njinda ia a kuata. Mukunji, dijina diê Paxulu, ua beta Jelemiia iu ua mu kutu ku muxi. Jelemiia ua bhiti usuku ua muvimba sé kudizambesa. Mu kúkia, Paxulu ua mu jituna. Jelemiia uixi: ‘Kuabhu. Nguami’ami dingi kuboka.’ Maji o kuila muene ka boko dingi? Kana. Jelemiia ua xinganeka kiambote iu ua zuela: ‘O njimbu ia Jihova iedi kála túbhia moxi diami. Ki ngi tokala kubhuila.’ Mu kiki, Jelemiia ua suluka mu ku dimuna o athu.
Kua bhiti mivu iavulu, mu ixi ia Judá mua kexile sobha ia ubhe. O akunji ni jipolofeta ja makutu a zembele o njimbu ia kexile mu boka Jelemiia. Mu kiki, a tangela o ilamba ia Juda, exi: ‘Diiala didi a tokala ku mu jibha.’ Jelemiia ua tambuijila: ‘Se mu ngi jibha, mua-nda jibha muthu ka te kituxi. O ima i nga mu zuela, ki ia mu tunda mu kanu diami, maji ia mu tunda kua Jihova.’ O ilamba kioso kievu kiki, a zuela: ‘Diiala didi ki tu tokala ku mu jibha.’
Jelemiia ua suluka mu kuboka, maji o ilamba a mu kuatele njinda iavulu. Ai mu zuela ni sobha phala kujibha Jelemiia. O sobha uambe kuila ene kiá ejidile kioso kieji bhanga ni Jelemiia. O ilamba a mesenene kujibha Jelemiia, mu kiki, a mu kuata iá a mu takula mu dikungu dia zongo diezalele ni malôua. Muenhomo, Jelemiia ua mateka kuboba.
Kuexile diiala, a mu ixanene Ebede-meleke ua tangela sobha, uixi: ‘O ilamba a takula Jelemiia mu dikungu! Se ki tu mu katula, muéne ua-nda fuá.’ O sobha ua tumu Ebede-meleke kuia ni 30 a mala, n’ai mu sunga Jelemiia mu dikungu. Sumbala ni hadi ia tale, Jelemiia ua boko ni kusuina kuoso, ni kukolokota. O kuila tua mesena kubhanga kála kia bhangele Jelemiia?
“Enu a kà mi zemba kuala athu oso mukonda dia dijina diami. Uoso-phe u kolokota katè bhu dizubhilu, muène uà bhuluka.”—Matesu 10:22
Eye Nange Wandawabhela we o Maka Yá
LONGA O TUANA TUÊ
Jelemiia ka Bhuila mu Kuzuela ia Lungu ni Jihova
Né muene o athu akexile ku mu xonguena mba kia a iibhile kioso kia kexile mu zuela ia lungu ni Nzambi, mukonda diahi Jelemiia ka bhuila?
JIVIDYU JA ILOMBOLWELU YA MADIVULU A BIBIDYA
Kilombolwelu Kya Divulu Dya Jelemiya
Jelemiya wa kolokota mu kubhanga o kikalakalu kyê kya upolofeta sumbala ni ibhidi.
