Yehoba watongwele Yelemiya kwikala ngauzhi wa bena Yuda. Lesa wamubujile kusapwila bantu ne kwibajimuna kuba’mba baleke kuba bintu byatama byo baubilenga. Yelemiya waambile’mba: ‘Anweba Yehoba, amiwa nkiji mwanyike. Kechi nayuka bya kwamba ku bantu ne.’ Bino Yehoba wamubijile’mba: ‘Kwakamwa ne. Nkakubula bya kwamba. Nkakukwasha.’

Yehoba waambijile Yelemiya amba akonkanye bakulumpe pamo, ne kulala mulondo saka bamonako ne kwibambila’mba: ‘Yelusalema bakamonauna byonka bino.’ Yelemiya byo aubile byamubujile Yehoba, bakulumpe bazhingijile bingi. Ñanga aye Pashula wapumine Yelemiya ne kumubika mu bikulu. Yelemiya waikele mu bikulu bufuku bonse. Lukelo, Pashula byo amufuminyemo mu bikulu, Yelemiya waambile’mba: ‘Kechi nafwainwa kuyandanga bino ne. Nsakwikileka kusapwila.’ Nanchi walekele kusapwila nyi? Ine. Yelemiya byo alangulukilepo jikwabo, waambile’mba: ‘Byambo bya Yehoba biji nobe mujilo mukachi kami. Kechi nafwainwa kuleka kusapwila ne.’ Yelemiya watwajijile kujimunako bantu.

Byo papichile myaka yavula bena Yuda baikele na mfumu wakatataka. Bañanga ne bangauzhi babubela kechi bakebanga kumvwa byasapwilanga Yelemiya ne. Baambijile babinemanga amba: ‘Uno mwanamulume wafwainwa kufwa. Yelemiya waambile’mba: ‘Inge mungipaye, musakungipayatu kyatu. Ñamba bimbula Yehoba, kechi ñamba byambo byami ne.’ Babinemanga byo  baumvwine bino, baambile’mba: ‘Uno muntu kumwipaya ne.’

Yelemiya watwajijile kusapwila, kabiji babinemanga bazhingijile bingi. Balombele mfumu kuba’mba bepaye Yelemiya. Mfumu waambile’mba bamube kyonse kyo bakeba kumuba Yelemiya. Bamukwachile Yelemiya ne kumutaya mu mushima wazhika mwajinga mateshi. Balangulukile’mba usakufwila monka. Yelemiya watatwile kwibila mu mateshi.

Bino mukulumpe wa kipango kya mfumu aye Ebeda-meleka waambijile mfumu amba: ‘Babinemanga bataya Yelemiya mu mushima. Inge tubule kumufumyamo usakufwa.’ Mfumu wakambizhe Ebeda-meleka kusenda banabalume 30 ne kuya na kufumya Yelemiya mu mushima. Ne atweba twafwainwa kwikala byonka byajinga Yelemiya, wabujile kuswisha kintu nangwa kimo kumulengela kuleka kusapwila mambo a Lesa.