တၢ်မၤလိ ၅၇
ယဟိဝၤယွၤဆှၢလီၤဝံယံးရမံယၤ လၢကလဲၤစံၣ်တဲၤတဲလီၤတၢ်
ယဟိဝၤယွၤ ဃုထၢထီၣ်စီၤယံးရမံယၤ ဒ်ဝံတဂၤလၢပှၤယူဒၤဖိတဖၣ်အဂီၢ်လီၤ. ကစၢ်ယွၤမၢလီၤ ဝံယံးရမံယၤလၢ ကစံၣ်တဲၤတဲလီၤတၢ် ဒီးဟ့ၣ်ပလီၢ်ပှၤယူဒၤဖိတဖၣ်ဒ်သိး အသုတမၤတၢ်အၢတၢ်သီလၢၤတဂ့ၤအဂီၢ်လီၤ. ဝံယံးရမံယၤတဲဝဲလၢ– ‘ယဟိဝၤယွၤဧၢ, ယမ့ၢ်ဒံးဖိသၣ်တဂၤလီၤ. ယတဲတၢ်လၢပှၤဂီၢ်မုၢ်အမဲာ်ညါတဘၣ်ဘၣ်.’ ယဟိဝၤယွၤတဲဘၣ်က့ၤအီၤလၢ– ‘ပျံၤတၢ်တဂ့ၤ. ယကဒုးသ့ၣ်ညါနၤ တၢ်လၢနကဘၣ်တဲ ဒီးယကမၤစၢၤနၤလီၤ.’
ယဟိဝၤယွၤတဲဘၣ် ဝံယံးရမံယၤလၢ ကိးဖှိၣ်ပှၤသူၣ်က့သးပှၢ်တဖၣ် ဒီးမၤသ့ၣ်ဖးသပၢၤလၢ အဝဲသ့ၣ်အမဲာ်ညါတက့ၢ်. ဒီးတဲဘၣ်အဝဲသ့ၣ်လၢ– ‘ဝ့ၢ်ယရူၤၡလ့ၣ်န့ၣ် ကဘၣ်တၢ်မၤဟးဂီၤအီၤဒ် သပၢၤတဖျၢၣ်အံၤအသိးလီၤ.’ ဖဲဝံယံးရမံယၤမၤဝဲဒ် ယဟိဝၤယွၤမၢအီၤအခါ ပှၤသူၣ်က့သးပှၢ်တဖၣ်အံၤ သးပှံၢ်ထီၣ်အီၤဒိၣ်မးလီၤ. ပှၤလုၢ်တၢ်အဒိၣ်တဂၤလၢအမံၤမ့ၢ် စီၤပၣ်ၡဃူၢ်န့ၣ် တီၢ်ဝဲဝံယံးရမံယၤ ဒီးကျီၤဃာ်အီၤလၢ သ့ၣ်ကျီၤတဖၣ် (ထိပ်တုံး) အပူၤလီၤ. ဒီတနၤကျၢၤန့ၣ် ဝံယံးရမံယၤဟူးဝဲတန့ၢ်ဘၣ်. လၢခံတဂီၤ ဖဲစီၤပၣ်ၡဃူၢ် ပျၢ်လီၤဝံယံးရမံယၤအခါ အဝဲတဲဘၣ်ယဟိဝၤယွၤလၢ– ‘ယတူၢ်တပှဲၤလၢၤဘၣ်. ယတစံၣ်တဲၤတဲလီၤတၢ်လၢၤဘၣ်.’ ဘၣ်ဆၣ် မ့ၢ်ဝံယံးရမံယၤပတုာ် စံၣ်တဲၤတဲလီၤတၢ်အနီၢ်ကီၢ်ဧါ. အဝဲတပတုာ်ဝဲဘၣ်. ဖဲဝံယံးရမံယၤဆိကမိၣ်ထီၣ် တၢ်ကစီၣ်လၢယဟိဝၤယွၤမၢ အစံၣ်တဲၤတဲလီၤဝဲအခါ အဝဲတဲဝဲလၢ– ‘ယဟိဝၤယွၤအတၢ်ကစီၣ်အံၤ လီၤဂာ်ဒ်မ့ၣ်အူအီၣ်တၢ်လၢ ယပူၤအဃိ ယမ့ၢ်တစံၣ်တဲၤတဲလီၤတၢ်န့ၣ် ယအိၣ်တကဲဘၣ်.’ လၢတၢ်န့ၣ်အဃိ ဝံယံးရမံယၤဆဲးဟ့ၣ်ပလီၢ်ဝဲပှၤဂီၢ်မုၢ်တဖၣ်လီၤ.
နံၣ်တဖၣ်လဲၤပူၤကွံာ်ဒီး ပှၤယူဒၤအစီၤပၤထီၣ်လၢ အသီတဂၤလီၤ. ပှၤလုၢ်တၢ်အဒိၣ်ဒီးဝံလၢအဘျၣ်တဖၣ် သးဟ့ဝဲဝံယံးရမံယၤအတၢ်ကစီၣ်လီၤ. အဝဲသ့ၣ်တဲဘၣ်ပဒိၣ်ဖးဒိၣ်တဖၣ်လၢ– ‘ပိာ်ခွါတဂၤအံၤ ကြၢးသံဝဲလီၤ.’ ဝံယံးရမံယၤတဲဝဲလၢ– ‘နမ့ၢ်မၤသံယၤန့ၣ် မ့ၢ်ဒၣ် နမၤသံပှၤလၢ အတၢ်ကမၣ်တအိၣ်ဘၣ်တဂၤလီၤ. ယတဲဘၣ်သု ယဟိဝၤယွၤအတၢ်ကစီၣ်လီၤ. တမ့ၢ် ယနီၢ်ကစၢ်အတၢ်ကစီၣ်ဘၣ်.’ ဖဲပဒိၣ်ဖးဒိၣ်တဖၣ်နၢ်ဟူ ဝံယံးရမံယၤအတၢ်ကတိၤအခါ အဝဲသ့ၣ်တဲဝဲလၢ– ‘ပိာ်ခွါတဂၤအံၤ တကြၢးသံဘၣ်.’
ဝံယံးရမံယၤဆဲးစံၣ်တဲၤတဲလီၤတၢ် အဃိပဒိၣ်ဖးဒိၣ်တဖၣ် သးပှံၢ်ထီၣ်အီၤဒိၣ်မးလီၤ. အဝဲသ့ၣ်မၢစီၤပၤမၤသံ ဝံယံးရမံယၤလီၤ. စီၤပၤဟ့ၣ်အခွဲးလၢ အဝဲသ့ၣ်ကမၤဝဲ ဝံယံးရမံယၤ ဖဲအဝဲသ့ၣ်အဲၣ်ဒိးမၤဝဲလီၤ. လၢတၢ်န့ၣ်အဃိ အဝဲသ့ၣ်ဖီၣ်န့ၢ် ဝံယံးရမံယၤဒီး တၢၤလီၤကွံာ်အီၤလၢ တၢ်ပူၤဖးယိာ် လၢအအိၣ်ဒီးကပံာ်န့ၣ်လီၤ. ဒီးအဝဲသ့ၣ် မုၢ်လၢ်ဝဲလၢ ဝံယံးရမံယၤကသံဝဲဖဲန့ၣ်လီၤ. ဝံယံးရမံယၤလီၤဘျၢဝဲကယီကယီလၢ ကပံာ်ကျါလီၤ.
ဝံၤဒီး ပဒိၣ်တဂၤလၢအမံၤမ့ၢ် စီၤဧ့ၤဘ့းမ့လ့းန့ၣ် အဝဲတဲဘၣ်ဝဲစီၤပၤလၢ– ‘ပဒိၣ်ဖးဒိၣ်တဖၣ်တၢၤလီၤဝဲ ဝံယံးရမံယၤလၢတၢ်ပူၤလီၤ. ပမ့ၢ်တထုးထီၣ်က့ၤအီၤန့ၣ် အဝဲကသံဝဲဖဲန့ၣ်လီၤ.’ ဒီးစီၤပၤမၢစီၤဧ့ၤဘ့းမ့လ့း ကိးထီၣ်ပှၤပိာ်ခွါအဂၤ ၃၀ ဒီးလဲၤထုးထီၣ်ကွံာ် ဝံယံးရမံယၤလၢတၢ်ပူၤလီၤ. ပကြၢးကွၢ်လိ ဝံယံးရမံယၤလီၤ. မ့ၢ်လၢဝံယံးရမံယၤ တဟ့ၣ်အခွဲးလၢ ပှၤကမၤပတုာ်အီၤလၢ ကစံၣ်တဲၤတဲလီၤတၢ်အဃိလီၤ.
“သုကဘၣ် တၢ်သးဟ့သုလၢပှၤကညီခဲလၢာ်လၢ ယမံၤအဃိလီၤ. မ့မ့ၢ် ပှၤလၢ အအိၣ်ဂၢၢ်ဆိးကျၢၤဝဲတုၤအကတၢၢ်န့ၣ်, ကဘၣ် တၢ်အုၣ်က့ၤခီၣ်က့ၤအီၤလီၤ.”—မးသဲ ၁၀:၂၂
တၢ်ဂ့ၤအဂၤလၢ နကဘၣ်သး
သိၣ်လိနဖိတဖၣ် တက့ၢ်
ဝံယံးရမံယၤတပာ်ကတီၢ် တၢ်တဲယဟိဝၤယွၤအဂ့ၢ်ဘၣ်
ပှၤတဲဆါအီၤဒီး သးထီၣ်အီၤဘၣ်ဆၣ် ဘၣ်မနုၤအဃိ စီၤယံးရမံယၤတဲဒံးဝဲ ယဟိဝၤယွၤ အဂ့ၢ်လဲၣ်.
တၢ်ဂီၤမူလၢ လံာ်စီဆှံ အကတြူၢ်အဂီၢ်
တၢ်ကတိၤအိးထီၣ်လၢ လံာ်ယံးရမံယၤအဂီၢ်
ဝံယံးရမံယၤန့ၣ် တူၢ်ဘၣ်ဝဲတၢ်မၤအၢမၤနး ဘၣ်ဆၣ် ဆဲးမၤဝဲယဟိဝၤယွၤ အတၢ်မၤလၢ တၢ်သးတီအပူၤလီၤ. ပဝဲခရံာ်ဖိတဖၣ် ပမ့ၢ်ဆိကမိၣ်ထံ အဂ့ၢ်န့ၣ် ကကဲဘျုးလၢပဂီၢ် လၢမုၢ်မဆါတနံၤအံၤလီၤ.
