Yave wasola Yeremiya mu kala ngunza kwa nkangu a Yuda. Wamvovesa vo kenda zayisa e nsangu kwa nkangu yo kubalukisa bayambula vanga mambu mambi bavanganga. Yeremiya wavova vo: ‘E Yave, yakinu nleke. Kize ko dina ndenda vova kwa nkangu.’ Yave wamvovesa vo: ‘Kumoni wonga ko. Ikuzayisa dina ovova. Ikusadisa.’

Yave wavovesa Yeremiya vo kakutakesa e mbuta za nkangu, kawula e kinzu vana bakala yo vova vo: ‘E mbanza Yerusaleme i wau ifwasilwa.’ Vava Yeremiya kazayisa dina Yave kamvovesa, ambuta bafunga kikilu makasi. O Paseku wa nganga owende Yeremiya yo kunsia muna kú kia vimbu dia nti. Yeremiya kalenda diata ko mu fuku wamvimba. Paseku wankatula muna kú mu mene walanda. Yeremiya wavova vo: ‘Kilendi zizidila diambu diadi ko. Kisila diaka umbangi ko.’ Nga wayambula kikilu sila umbangi? Ve. Vava Yeremiya katoma yindula e diambu diadi, wavova vo: ‘E diambu dia Yave dina nze tiya omu mono. Kilendi yambula sila umbangi ko.’ Yeremiya wakwamanana lukisa nkangu.

Vioka mvu miayingi, vavaika ntinu ampa muna Yuda. E mfumu za mabundu ye ngunza za luvunu ke bazolanga nsangu za Yeremiya ko. Bavovesa akuluntu vo: ‘O muntu ndioyo lufwa kafwanukinu.’ Yeremiya wavova vo: ‘Avo numpondele, mu nkondwa kuma nuvonda. Mambu ma Yave mpovele, ke mame ko.’ Vava akuluntu bawá e mvovo miami, bavova vo: “O muntu ndioyu kafwene fwa ko.”

 Yeremiya wakwamanana sila umbangi, akuluntu bafunga kikilu makasi. Balomba nswa kwa ntinu kimana bavonda Yeremiya. O ntinu wavova vo bavanga mawonso bazolele kwa Yeremiya. Babaka Yeremiya yo kuntuba muna wulu diazala ye nteke, bazola vo Yeremiya kafwila muna wulu. Yeremiya wayantika dimuka muna nteke.

I bosi, muntu mosi wasadilanga kuna lumbu lwa ntinu, nkumbu andi Ebede-meleke, wavovesa ntinu vo: ‘Akuluntu batubidi Yeremiya muna wulu. Avo tunyambwidi, fwa ke fwa.’ O ntinu wakanikina Ebede-meleke vo kabaka wantu 30 kimana bavaikisa Yeremiya muna wulu. Nga ke diambote ko twatanginina Yeremiya ona kayambula ko vo konso diambu diamfila mu yambula sila umbangi?