Jehova naaketile Jeremia kuba mupolofita wa batu ba Juda. Naamutaluselize kuyo kutaza kwa batu ni kubalemusa kuli batuhele kueza lika zemaswe. Jeremia ali: ‘Jehova, ni mutangana feela. Hanizibi mwakubulelela kwa sicaba.’ Jehova amubulelela kuli: ‘Usike wasaba. Nika kutaluseza zeukayo bulela. Nikakutusa.’

Jehova abulelela Jeremia kukopanya baana-bahulu, kutuba nkwana ya lizupa fapilaa bona, ni kubulela kuli: ‘Jerusalema ni yona ikatubiwa ka nzila yeswana.’ Jeremia hanaaezize zanaa mutaluselize Jehova, baana-bahulu banyema hahulu. Muprisita yabizwa Pashuri anata Jeremia ni kumubeya mwa likulo. Busihu kaufela, Jeremia naasakoni kunyanganya. Habusa kakusasana, Pashuri amulukulula. Jeremia ali: ‘Hanisa kona kuzwelapili kutiyela muinelo wo. Nikatuhela kukutaza.’ Kana luli naazwafile? Batili. Jeremia hasaanahanisisize hahulu ka za teñi, abulela kuli: ‘Linzwi la Jehova liswana inge mulilo mwa mubili waka. Hanikoni kutuhela kukutaza.’ Jeremia naazwezipili kulemusa batu.

Hamulaho wa lilimo zeñata, kwaba ni mulena yomunca mwa Juda. Baprisita ni bapolofita ba buhata nebatoile lushango lwa Jeremia. Babulelela manduna kuli: ‘Muuna yo uswanela kushwa.’ Jeremia ali ku bona: ‘Haiba munibulaya, mukabulaya muuna yasina mulatu. Nibulela manzwi a Jehova, isiñi akuikupulela feela.’ Manduna habautwile cwalo, babulela kuli: ‘Muuna yo halukeli kushwa.’

Jeremia azwelapili kukutaza, mi manduna bafilikana hahulu. Bakupa mulena kuli abulaye Jeremia. Mulena  abataluseza kuli bakona kueza nto ifi kamba ifi yebalata ku Jeremia. Baisa Jeremia ni kuyo muyumbela mwa musima otungile mone kunani sileze, ka kusepa kuli naaka shwela mwateñi. Jeremia akala kutotobela mwa sileze.

Cwale sikombwa yabizwa Ebedi-meleki ali ku mulena: ‘Manduna banepezi Jeremia mwa lisima! Haiba lumusiya, ukashwela mwateñi.’ Mulena kihaa laela Ebedi-meleki kuya ni baana ba 30 kuli ayo zwisa Jeremia mwa lisima. Kaniti luli, luswanela kuba sina Jeremia yanaasika tuhelela nto ifi kamba ifi kumupaleliswa kukutaza.