Yehova wātongele Yelemia ekale mupolofeto ku bantu ba Yuda. Yehova wāmusoñenye akasapwile bantu ne kwibadyumuna mwanda wa baleke kulonga bintu bibi. Yelemia wānenene amba: ‘Ino a Yehova, nekidi mwanuke. Nkiyukilepo ne mwa kwisambila na bantu mwine.’ Yehova wāmunena’mba: ‘Kokakwatwa moyo. Nsa kukulombola bya kunena. Nsa kukukwasha.’

Yehova wāsapwidile Yelemia akongakanye bakulumpe ba bantu, alale mulondo wa dilongo ku meso abo, ne kunena’mba: ‘Yelusalema usa kulalwa pamo bwa uno mulondo.’ Yelemia paālongele byāmunenene Yehova, bakulumpe bālobele bininge. Kitobo umo witwa bu Pashula wākupile Yelemia, wāmwela mu bikulo. Bufuku bonso, Yelemia kādipo ubwanya kujina. Pashula wāmulupula’mo ke lubanga. Yelemia wānena’mba: ‘Naleka’byo. Nkikisapulapo monka.’ Le na bubine wālekele’byo? Aa. Yelemia pa kulangulukila’po bininge, wānenene amba: ‘Musapu wa Yehova udi pamo bwa mudilo munda mwami. Nkibwanyapo kuleka kusapula.’ Yelemia wāendelele nyeke kudyumuna bantu.

Myaka pa kupita’po, mu Yuda mwābikala mulopwe mupya. Babitobo ne bapolofeto ba bubela bādi bashikwe musapu wa Yelemia. Bāsapwidile bamfumu amba: ‘Uno muntu ufwaninwe kufwa.’ Yelemia wānena’mba: ‘Shi mungipaye, mubaipaya muntu wampikwa mambo. Ami nesambanga binenwa bya Yehova, ke byamipo.’ Bamfumu pa kumwivwana, bānena’mba: ‘Uno muntu kafwaninwepo kufwa.’

Yelemia wāendelele kusapula, bamfumu bāloba bininge.  Bākalomba mulopwe mwanda wa bepaye Yelemia. Mulopwe wēbanena balonge Yelemia byonso byobasaka. Bākwata Yelemia bākamwela mu mushimwa mulampe mwādi bitoto, na kulanga’mba usa kufwila monka. Yelemia wāanza kukulukila mu bitoto.

Mwingidi umo wa mu kipango witwa bu Ebede-Meleke, wāsapwila mulopwe amba: ‘Bamfumu abaela Yelemia mu mushimwa! Shi tumuleke’mo, usa kufwa.’ Mulopwe wāsoñanya Ebede-Meleke asele bana-balume 30 bakābule Yelemia mu mushimwa. Le netu tubulwe’po kwikala bwa Yelemia, mwine kālekelepo kintu nansha kimo kimukankaje kusapula?