Yehowa wakasungula Yelemiya bua ikale muprofete bua tshisamba tshia Yuda. Wakamuambila bua kuyisha bantu, ne kubadimuija bua balekele kuenza malu mabi. Yelemiya wakamba ne: ‘Kah, Yehowa, ntshidi anu muana. Tshiena mumanye mua kuakula kumpala kua bantu to.’ Yehowa wakamuambila ne: ‘Kutshinyi to. Nenkuambile tshia wewe kuamba. Nenkuambuluishe.’

Yehowa wakambila Yelemiya bua kusangisha bakulu ba mu tshisamba, kutayisha mulondo wa dima kumpala kuabu, ne kubambila ne: ‘Nebatayishe Yelushalema mushindu eu.’ Pavua Yelemiya muenze tshivua Yehowa mumuambile atshi, bakulu bakafiika munda bikole. Muakuidi mukuabu diende Pashû wakakuma Yelemiya, kumubuejaye bianza ne makasa mu bikunyi. Yelemiya kavua mua kunyunga butuku bujima to. Pashû wakamupatula mu dinda. Yelemiya wakamba ne: ‘Ebi biantondi. Tshiakuyisha kabidi to.’ Kadi mu bulelela uvua mulekele kuyisha anyi? Tòo. Pavua Yelemiya muelele bualu abu meji kabidi, wakamba ne: ‘Mukenji wa Yehowa udi anu bu kapia munda muanyi. Tshiena mua kulekela kuyisha to.’ Yelemiya wakatungunuka ne kudimuija bantu.

Pakapita bidimu, kuakalua mukalenge mukuabu mu Yuda. Bakuidi ne baprofete ba dishima kabavua banange mukenji wa Yelemiya to. Bakambila bakokeshi ne: ‘Muntu eu mmukumbanyine lufu.’ Yelemiya wakamba ne: ‘Nuenu banshipe, nudi nushipa muntu udi kayi ne bualu. Mêyi andi ngamba nga Yehowa, ki nnganyi to.’ Pavua bakokeshi bumvue bualu abu, bakamba ne: ‘Muntu eu ki mmukumbanyine lufu to.’

Yelemiya wakatungunuka anu ne kuyisha, bakokeshi kufiikabu munda  bikole. Bakalomba mukalenge bua kushipa Yelemiya. Mukalenge wakabambila bua benzele Yelemiya tshionso tshivuabu basue. Bakangata Yelemiya, kumuimanshabu mu tshina tshia mâyi tshile tshikale ne bitotshi, bajinga bua afuile muntu amu. Yelemiya wakatuadija kudiina mu bitotshi.

Pashishe muena mudimu mukuabu wa mu lubanza lua mukalenge diende Ebede-meleke wakambila mukalenge ne: ‘Bakokeshi mbimanshe Yelemiya mu tshina tshia mâyi! Tuetu bamushiyamu, neafue.’ Mukalenge wakatumina Ebede-meleke dîyi bua kuya ne bantu 30 bua kupatula Yelemiya mu tshina tshia mâyi. Katuenaku mua kufuana Yelemiya uvua kayi mulekele tshintu nansha tshimue tshimupangisha bua kuyisha anyi?