KUDIZA 57
Yehova Namutemeshi Yeremiya naKushimwina
Yehova wamutondeli Yeremiya kwikala kaprofwetu kawantu amuYuda. Wamulejeli nindi ayishimwini nikuyisoñamisha aleki kwila yuma yatama. Yeremiya wahosheli nindi: ‘Eyi Yehova, ami nichidi kansi hohu. Neluka kuhosha nawantu wanyi.’ Yehova wamulejeli nindi: ‘Bayi wutiya womaku. Nukukulejaña yuma yejima yiwatela kuhosha. Nukukukwashaña.’
Yehova wamulejeli Yeremiya nindi apompeshi akulumpi jawantu, achiki nsaba yewumba iku anakutalaku, nakuhosha nindi: ‘Ichi dichakamuchikawu niYerusalema.’ Cheliliyi mwamulejeliwu kudi Yehova, akulumpi ahilili nankashi. Kapristu wejina daPashihuri wamweteli Yeremiya nawa wamushili mumpompa yamapulanga. Wufuku wejima, Yeremiya wadiña mumpompa. Pashihuri wamuumbiliku ifuku dalondelelihu nantetemena. Yeremiya wahosheli nindi: ‘Hinukutwesha kuumika chumichiku. Inakuleka kushimwina.’ Komana walekeli? Inehi. Yeremiya chelili atoñojokihu nankashi, wahosheli nindi: ‘Nsañu yaYehova yidi neyi kesi mumuchima wami. Nukutwesha kuleka wanyi kushimwina.’ Dichi watwalekelihu kusoñamisha antu.
Chimwahitili yaaka, muYuda mwekalili mwanta wamuha. Atupristu niatuprofwetu akutwamba aheleli nsañu yashimwinineñayi Yeremiya. Ayilejeli ayilolu nawu: “Iwu iyala watelela kufwa.” Yeremiya wahosheli nindi: ‘Neyi mukunjaha, mukujaha muntu wakadi muloña. Nahoshaña mazu aYehova, bayi amiku.’ Ayilolu chatiyiliwu mwahosheliyi, ahosheli nawu: “Iwu iyala watelela kufwa wanyi.”
Yeremiya watwalekelihu nakushimwina nawa ayilolu ahilili chikupu. Amulejeli mwanta nawu amujahi Yeremiya. Mwanta wahosheli nindi atela kumwila Yeremiya mwejima munakukeñawu kumwila. Amusendeli nakumunatila mwishima dakunama, mwadiña malowa, nakutoñojoka nawu wukufwila mwenomu. Yeremiya watachikili kwiñila mumalowa.
Kuhiñahu chilolu wamuchota wejina daEbedi Meleki wamulejeli mwanta nindi: ‘Ayilolu anamunatili Yeremiya mwishima! Neyi tukumufumishamu wanyi, wukufwa.’ Mwanta wamulejeli Ebedi Meleki nindi asendi amayala 30 kulonda ayi nakumukokamu Yeremiya mwishima. Komana kwila twikala neyi Yeremiya wabulili kwiteja chuma chidi chejima kumukañesha kushimwina nehi?
“Akayihela kudi antu ejima kukoola ijina dami, ilaña muntu wejima wakomika kushika nikunsa, diyi akamwinawu.”—Matewu 10:22
You May Also Like
DIZISHENU ANYANENU
Yeremiya Watwalekeluhu Kuhosha Hadi Yehova
Hela chakwila antu amuseheleña nikumuhela, muloñadi Yeremiya chatwalekeluhu kuhosha hadi Nzambi?
MAVIDIYO ANTACHIKILU YANYIKANDA YAMUBAYIBOLU
Ntachikilu yaYeremiya
Yeremiya wadiña washinshika chikupu namudimu windi hela chakwila wamweneña kukala. Toñojokenu chakutalilahu chindi chichinateli kukwasha akwaKristu makonu.
