SAMBILILO 57
Yeova Watuma Yelemiya Umu Kusimikila
Yeova wasoolwile Yelemiya kuti aye kasesema uku yantu aa mu Yuda. Wamuneenyile ukulasimikila nu kuneena antu kuti yate ukucita iviipe. Yelemiya walanzile ati: ‘We Yeova, nene umwance. Ntamanyile ivyakulanda na antu.’ Yeova nawe wamuneenyile ati: ‘Utuvwa intete. Ndakuneena ivyakuti uvwange nupya ndakwazwa.’
Yeova waneenyile Yelemiya ukukolonganika aikolo aa mu musumba, nu kutamola inyungu ala yakulolako, nu kulanda ati: ‘Vikwene ali vino Yelusalemu alononwa.’ Lino Yelemiya wacisile vino Yeova wamuneenyile, aikolo yasosile sana. Simapepo uwi izina ilyakuti Pasyuli umile Yelemiya nu kumwika makasa na makulu yakwe umu minyololo. Yelemiya wali pali pamwi usiku onsi. Pasyuli wamusapwile uwanda uwalondelilepo katondo. Lyene Yelemiya watiile: ‘Ntanga nkwanisye ukusimikila. Nimaata.’ Nomba uzye watiile ukusimikila? Awe foo. Lino Yelemiya welenginyepo sana, walanzile ati: ‘Ilandwe lyakwe Yeova lyaya wa moto umu mwenzo wane. Ntanga inte ukusimikila.’ Fwandi Yelemiya watwalilile ukucelula antu.
Lino papisile imyaka, umu mpanga iya Yuda mwali umwene umupya. Ya simapepo na ya Kasesema ya ufi yapasile ilyasi lino Yelemiya wasimikilanga. Yaneenyile ya cilolo ati: ‘Umuntu wii alinzile ukufwa.’ Yelemiya nawe watiile: ‘Nga mwankoma, ale mwakoma umuntu wakaele. Nkalanda amazwi yakwe Yeova, asi yane foo.’ Lino ya cilolo yuvwile amazwi yaa, yalanzile iyati: ‘Umuntu wii atalinzile ukufwa.’
Yelemiya watwalilile ukusimikila, na cii calenzile ya cilolo yasoke sana. Yaneenyile umwene ukuti Yelemiya akomwe. Nupya umwene wayaneenyile ukuti yacite Yelemiya vyonsi vino yakulonda. Yamulemile iyamusumbila umu ciwina icali cizike sana umwali amatipa, ala yakwelenganya ukuti amafwila mumu kwene. Lino Yelemiya yamusumbile, watandike ukutika umu matipa.
Ebedimeleki umuomvi uwa kwi sano waneenyile umwene ati: ‘Ya cilolo iyasumbila Yelemiya umu ciwina. Nga twamuleka mumu kwene amafwa.’ Lyene umwene waneenyile Ebedimeleki ukusenda aonsi 30 kuti yakafumye Yelemiya umu ciwina. Uzye naswe kwene tutalinzile ukuya wakwe Yelemiya, aatalesile ukuti icili consi cimulesye ukusimikila?
“Nupya antu yonsi yalamupata pa mulandu wi zina lyane, lelo uwazizimizya ukufika nu ku mpela wene alapusuka.”—Mateo 10:22
Limwi Mungatemwa Ukulolako na Vii
MWASAMBILIZYA ANA INU
Yelemiya Ataatiile Ukulanda Pali Yeova
Nanti icakuti antu yaasowekanga Yelemiya nu kusoka, u mulandu ci uno Yelemiya watwaliliile ukulanda pali Leza?
MAVIDYO AAKULONDOLOLA MABUKU AMULI BAIBO
Ivyeo Ivikulondolola Ibuku Lyakwe Yelemiya
Yelemiya watwalilile ukuya uwa cumi umu mulimo uno wapeezilwe wakwe ukasema nanti cakuti wayanga ni ntazi. Lolini vino ukukolanya vino Yelemiya wacisile kungatwavwa ndakai.
