A Zeova yãka a Zeremi t’a lebg Zida buudã no-rɛɛsa. A yeel-a lame t’a tɩ moone, n yeel nebã tɩ b bas b tʋʋm-wẽnsã. La a Zeremi yeelame: ‘Zeova, mam nan yaa biiga. Mam pa mi m sẽn na n tɩ gom ne nebã to-to ye.’ A Zeova yeel-a lame yaa: ‘Da yɛɛs ye. Mam na n wilga foom f sẽn tog n yeele. Mam na n sõnga foo.’

A Zeova yeela a Zeremi t’a tigim tẽngã kãsem-dãmba, n wãag rʋk b taoor n yeel yaa: ‘B na n sãama Zerizalɛm woto.’ A Zeremi sẽn maan a Zeova sẽn yeelã, kãsem-dãmbã sũy yika wʋsgo. Maan-kʋʋd a ye la b ra boond t’a Pasʋʋr. A pãba a Zeremi, n kɩt tɩ b sog a karsã la a nusã ne raoodo. A Zeremi paa be yʋngã tõre, n pa tõe n yẽrg meng ye. Vẽkembeoogã, a Pasʋʋr basa a Zeremi t’a looge. Dẽ, a Zeremi yeelame yaa: ‘M na n basa koɛɛgã moonego. M pa le tõe ye.’ La rẽ yĩnga, a sɩd basame bɩ? Ayo. A maneg n tagsa sõma, la a yeele: ‘A Zeova gomdã yaa wa bugum sẽn be mam yĩngẽ wã n wita. Mam pa tõe n bas koɛɛgã mooneg ye.’ A Zeremi kell n moona koɛɛgã.

Kaoosg zugẽ, Zida nebã paama rĩm-paalga. Maan-kʋʋdbã ne ziri no-rɛɛsdbã ra pa nong koɛɛgã a Zeremi sẽn da taasdã ye. B yeela nanambsã yaa: ‘B tog n kʋʋ rao-kãngã.’ La a Zeremi yeelame: ‘Mam pa maan yãmb bũmb la y sẽn dat n kʋ maamã. Pa mam meng koees la m taasd ye. Yaa a Zeova koeese.’ Nanambsã sẽn wʋmã, b yeelame yaa: ‘D ra kʋ-a ye.’

 A Zeremi ra ket n moonda koɛɛgã. Nanambsã sũy yika wʋsgo, tɩ b yeel rĩmã t’a kɩt tɩ b kʋ-a. Rĩmã yeel-b lame tɩ b maan-a b sẽn date. B tɩ lob-a-la bulg sẽn yaa zulung pʋgẽ, tɩ yaa bɛgdo, n dat t’a ki. A Zeremi sɩnga sudb bɛgdẽ wã.

Rĩmã tʋm-tʋmd a ye b sẽn boond t’a Ebɛɛd-melɛk tɩ yeela rĩmã yaa: ‘Nanambsã loba a Zeremi bulg pʋgẽ. D sã n pa yiis-a, a na n kiime.’ Rĩmã yeela a Ebɛɛd-melɛk t’a bao neb 30 tɩ b tɩ tak a Zeremi n yiis bulgẽ wã. A Zeremi pa bas tɩ bũmb gɩdg-a t’a pa le moon koɛɛgã ye. Tõnd me pa segd n maan wa yẽ sɩda?