သင်ခန်းစာ ၅၇
ယေဟောဝါက ယေရမိကို ဟောပြောဖို့ စေလွှတ်
ယေဟောဝါက ယေရမိကို ယုဒလူတွေရဲ့ ပရောဖက်ဖြစ်ဖို့ ရွေးချယ်ခဲ့တယ်။ လူတွေကို ဟောပြောဖို့၊ မကောင်းတာတွေကို မလုပ်ကြဖို့ သတိပေးခိုင်းတယ်။ ဒါနဲ့ ယေရမိက ‘ယေဟောဝါ၊ ကျွန်တော်ဟာ လူငယ်လေးပါ။ ပြောတတ်ဆိုတတ်သူ မဟုတ်ဘူး’ ဆိုပြီး တောင်းပန်တယ်။ ဒါနဲ့ ယေဟောဝါက ‘မကြောက်ပါနဲ့၊ ဘာပြောရမလဲဆိုတာ မင်းကို ငါပြောပြမယ်။ ငါကူညီပေးမှာပါ’ လို့ သူ့ကို ကတိပေးတယ်။
ယေဟောဝါက ယေရမိကို အကြီးအကဲတွေ ခေါ်ခိုင်းပြီး သူတို့ရှေ့မှာ မြေရေတခေါင်းကို ခွဲခိုင်းတယ်။ ပြီးတော့ ‘ဂျေရုဆလင်မြို့ကို ဒီအတိုင်းပဲ ခွဲပစ်မယ်’ လို့ ပြောခိုင်းတယ်။ ယေဟောဝါ ပြောတဲ့အတိုင်း ယေရမိ လုပ်တဲ့အခါ လူတွေက အကြီးအကျယ် စိတ်ဆိုးတယ်။ ပါရှုရလို့ခေါ်တဲ့ ပုရောဟိတ်တစ်ယောက်က ယေရမိကို ရိုက်နှက်ပြီး ထိတ်တုံးခတ်ထားတယ်။ ယေရမိခမျာ တစ်ညလုံး မလှုပ်ရှားနိုင်ဘူး။ ပါရှုရက နောက်နေ့မနက်မှာ ထိတ်တုံးဖြုတ်ပေးလိုက်တယ်။ ဒီအခါ ယေရမိက ‘ငါ မခံနိုင်တော့ဘူး။ မဟောပြောတော့ဘူး’ လို့ ပြောမိပေမဲ့ သူ တကယ်ပဲ အရှုံးပေးသလား။ အရှုံးပေးမယ့်အစား ယေရမိက ‘ယေဟောဝါရဲ့ နှုတ်ထွက်စကားတွေဟာ ရင်ထဲမှာ မီးလိုပဲ။ မဟောဘဲ မနေနိုင်ဘူး’ လို့ ပြောတယ်။ ဒါနဲ့ပဲ လူတွေကို ယေရမိ ဆက်သတိပေးတယ်။
နှစ်အတော်ကြာတဲ့အခါ ယုဒပြည်မှာ ဘုရင်အသစ် နန်းတက်တယ်။ ပုရောဟိတ်တွေ၊ ပရောဖက် အတုအယောင်တွေက ယေရမိရဲ့ စကားကို မကြားချင်ဘူး။ ဒါနဲ့ မင်းညီမင်းသားတွေကို သူတို့က ‘ဒီလူ သေခံထိုက်တယ်’ လို့ ပြောတယ်။ ဒီအခါ ယေရမိက ‘မင်းတို့ ငါ့ကို သတ်မယ်ဆိုရင် အပြစ်မရှိသူကို သတ်ပစ်တာပဲ။ ငါက ယေဟောဝါရဲ့ စကားကို ပြောနေတာ’ လို့ ပြောတော့ မင်းညီမင်းသားတွေက ‘ဒီလူ မသေထိုက်ပါဘူး’ လို့ ပြန်ပြောတယ်။
ယေရမိ ဆက်ဟောပြောတော့ မင်းညီမင်းသားတွေလည်း စိတ်ဆိုးလာတယ်။ ဒီတော့ ယေရမိကို သတ်ပစ်ပါလို့ ဘုရင်ကို ပြောတယ်။ ဘုရင်က ‘မင်းတို့ ယေရမိကို ကြိုက်သလိုလုပ်’ လို့ ဖြေတယ်။ ဒါနဲ့ ယေရမိကို ဖမ်းချုပ်ပြီး ရွှံ့နွံတွေရှိတဲ့ ရေလှောင်ကန်ထဲမှာ သေသွားရအောင် ပစ်ချလိုက်တယ်။ ယေရမိလည်း ရွှံ့နွံထဲ နစ်နေတယ်။
အဲဒီအချိန်မှာ မိန်းမစိုး ဧဗဒမေလက်က ‘မင်းညီမင်းသားတွေဟာ ယေရမိကို ရေလှောင်ကန်ထဲ ပစ်ချထားတယ်။ အဲဒီမှာ သူ့ကို ပစ်ထားမယ်ဆိုရင် သေမှာပဲ’ လို့ ဘုရင်ကို ပြောပြတော့ လူ ၃၀ နဲ့အတူသွားပြီး ယေရမိကို ရေလှောင်ကန်ထဲကနေ ဆွဲထုတ်လိုက်ဖို့ ဧဗဒမေလက်ကို ဘုရင် အမိန့်ပေးတယ်။ အတားအဆီးတွေကြား မဟောဘဲမနေခဲ့တဲ့ ယေရမိကို မတုပချင်ဘူးလား။
“ကျွန်တော့်နာမည်ကြောင့် ခင်ဗျားတို့ကို လူတွေ မုန်းကြလိမ့်မယ်။ ဒါပေမဲ့ အဆုံးထိ ခံနိုင်ရည်ရှိတဲ့သူဟာ ကယ်တင်ခံရလိမ့်မယ်။”—မဿဲ ၁၀:၂၂