Jehová kitlapejpenik Jeremías ma eli tlajtolpanextijketl ipan Judá. Kinauatik ma tlajtolmoyaua uan ma kiniljui maseualmej ayokmo ma kichiuakaj tlen amo kuali. Jeremías kiiljuik Jehová: “Na nojua nitelpokatl. Uan amo niuelis nikamanaltis ininixpa sekinok”. Jehová kiiljuik: “Amo ximajmaui. Na nimitspaleuis uan nimitsiljuis tlen tikijtos”.

Jehová kiiljuik Jeremías ma kinsentili ueuejtlakamej, uan ma kitlapana se sokichachapali ininixpa, uan ma kiniljui: “Kiampa kipanos Jerusalén”. Kema Jeremías kichijki tlen Jehová kinauatik, nopa ueuejtlakamej tlauel kualankej. Se sacerdote tlen motokaxtiyaya Pasur, kimakilik Jeremías uan kitlalik ipan se cepo, uan seyoual nopaya kikajki. Se cepo kichijchiuayayaj ika uapali uan nopaya kikalakiyayaj imets uan ima se akajya, uan amo ueliyaya mojmolinia. Ualmostla, Pasur kikixtik Jeremías. Uan Jeremías kiijtok: “Ayokmo nikijiyouia. Na ayokmo nitlajtolmoyauas”. ¿Timoiljuia kichijki tlen kiijtok? Amo. Jeremías kuali moiljuik tlen kichiuaskia uan kiijtok: “Tlen Jehová kineki ma nijmoyaua eli kejuak se tlitl tlen eltok ipan noyolo. Moneki nitlajtolmoyauas”. Yeka Jeremías nojua tlajtolmoyajki.

Kema panok miak xiuitl, se yankuik tlanauatijketl pejki tekichiua ipan Judá. Nopa ueuejtlakamej uan tlajtolpanextianij katli san istlakatiyayaj amo kinpaktiyaya tlen Jeremías kiijtouayaya. Yeka kiniljuitoj nopa tlayakananij: “Kinamiki ma tijmiktikaj ni tlakatl”. Jeremías kiniljuik: “Na amo tleno nijchijtok. Tlaj innechmiktisej, intlajtlakolchiuasej. Na san nikijtoua tlen Jehová nechnauatia uan amo tlen na nimoiljuia”. Kema nopa tlayakananij kikajkej tlen kiijtok, kiijtojkej: “Amo kinamiki tijmiktisej ni tlakatl”.

 Jeremías nojua tlajtolmoyajtinenki, uan teipa nopa tlayakananij kualankej. Kiiljuijkej nopa tlanauatijketl ma kimikti Jeremías. Nopa tlanauatijketl kiniljuik ma kichiuilikaj tlen inijuantij kinekiskiaj. Yeka kiitskijkej Jeremías uan kimajkajkej ipan se ameli kampa san onkayaya sokitl, uan kikajkej nopaya ma miki. Jeremías mosokitoktiajki.

Uajka Ebed Melec, katli kitekipanouayaya nopa tlanauatijketl, kiiljuik: “Nopa tlayakananij kimajkajkej Jeremías ipan se ameli. Tlaj amo tijkixtisej, mikis”. Nopa tlanauatijketl kiiljuik ma kinuika 30 tlakamej uan ma kikixtiti Jeremías. Jeremías nochipa tlajtolmoyajki. ¿Tijnekiskia tijchiuas kej ya?