Jiova kiixpejpenak Jeremías maj yeskia tanauatijkej itech xolal Judá. Kinauatij maj kinnejmachtiti akin ompa nemiaj ke monekia amo kichiuaskejok tein amo kuali. Sayoj ke Jeremías kinankilij Jiova: “Semi nitelpoch, amo nikmati keniuj nitajtos ininixpan taltikpakneminij”. Jiova motenkauak: “Amo ximoui, nejua nimitspaleuis uan nimitsiluis tein moneki tikijtos”.

Jiova kiluij Jeremías maj kinsentiliani tayekananij, maj kitapanani se komit ininixpan uan maj kiniluiani: “Yejua nejin kipanoti Jerusalén”. Keman Jeremías kichiuak nejon, tayekananij tel kualankej. Se tiopixkat akin monotsaya Pasjur kimaak Jeremías uan itech seki uapal kitsikoj imauan uan imetsuan. Jeremías amo uelik moolinij nochi youal. Pasjur kikixtij mostika kualkan. Satepan Jeremías kijtoj: “Amo nitaxikouaok. Amo nitanojnotsasok”. Sayoj ke ¿yekmelauj ijkon kichiuak? Amo. Jeremías okachi kuali kinemilij uan kijtoj: “Itanauatil Jiova moajsi noijtik kemej se tit. Moneki niksentokas nitanojnotsas”. Yejua ika kisentokak kinnejmachtij taltikpakneminij.

Miak xiujmej satepan, se yankuik tekiuaj peuak taixyekana Judá. Tiopixkamej uan tanauatianij akin takajkayauayaj amo kinyolpaktiaya tein Jeremías kiteixmatiltiaya. Yejua ika kiniluijkej ueyichiuanimej: “Nejin takat kinamiki mikis”. Jeremías kijtoj: “Komo nanechmiktiaj, nankimiktiskej se takat akin amo kichiujtok tein amo kuali. Nejua nikijtoua tein Jiova nechnauatia, amo tein nejua niknemilia”. Keman ueyichiuanimej kikakkej nejon, kijtojkej: “Nejin takat amo kinamiki mikis”.

Jeremías kisentokak tanojnotsak, sayoj ke axkan ueyichiuanimej tel  kualankej uan kitajtanijkej tekiuaj maj kimiktiani. Tekiuaj kiniluij maj kichiuilianij tein kinekiskiaj. Yejua ika kikitskijkej uan kipantamotkej itech se uejkatan atekoch tein kipiaya miak sokit maj ompa momikiliani. Jeremías yolik pankalaktiyajki itech sokit.

Satepan, se ueyichiujkej akin motokaytiaya Ébed-Mélec kiluij tekiuaj: “Ueyichiuanimej kipantamotkej Jeremías itech se uejkatan atekoch. Komo tikauaj ompa, mikis”. Tekiuaj kinauatij Ébed-Mélec maj kinuikani 30 takamej uan maj kikixtianij. Jeremías amo kikauak maj nion teyi kitsakuiliani maj kisentokani tanojnotsani. ¿Melauj ke tikneki tiyeski kemej yejua?