Jehová okitlapejpeni Jeremías matekiti ken teotlajtoketl ipan Judá. Okijli makinnojnotsa akin ompa chantiyaj niman makimijli ika makikajkauakan ika kichiuaj tlen xkuajli. Jeremías okinankili Jehová: “Nejua san nitelpochtli, xnikmati kenon nitlajtos imixpan tlaltikpakchanejkej”. Jehová okijli: “Maka xmomojti. Nejua nimitsijlis tlenon tikijtos. Nejua nimitspaleuis”.

Jehová okijli Jeremías makinsentlali akin kiyekanaj kalpan, makitlapana se kontli tlachijchiujtli ika sokitl imixpan niman makimijli: “Jerusalén xaxamanis ijkon ken yejuin”. Ijkuak Jeremías ijkon okichiuj, tlayekankej melak okualankej. Se teopixki itoka katka Pasjur okiuisok Jeremías niman ipan se kojtli tlen kojkoyonki katka itoka cepo, okitlalili imauan niman ikxiuan. Jeremías xouel onouiyoni nochi yeuajli. Uajmostla Pasjur okimakauj. Kuakon Jeremías okijto: “Xok nikxikoua. Nikajkauas ika nitenojnotsa”. San ika ¿yemelak ijkon okichiuj? Ka. Jeremías kuajli okinemili niman okijto: “ITlajtol Jehová kentla tlitl tlen noijtik onka. Xuelis nikajkauas ika nitenojnotsas”. Jeremías xokikajkauj ika tenojnotsa.

Opanok seki xiuitl niman se yenkuik tekiuaj opeuj tlanauatia Judá. Teopixkej niman tlakajkayaujkej teotlajtokej kinkualaniaya tlen kijtouaya Jeremías. Ika yejon, okimijlikej akin ueyixtoyaj: “Yejuin tlakatl kinamiki mamiki”. Jeremías okijto: “Tla ninechmiktiaj, nenkimiktiskej se tlakatl akin kichiua tlen kuajli. Nikijtoua tlen Jehová yonechnauati, xsan tlen niknemilia”. Ijkuak tlayekankej okikakej yejuin, okijtokej: “Yejuin tlakatl xkinamiki mamiki”.

 Jeremías xokikajkauj ika tenojnotsa, san ika, aman tlayekankej melak okualankej, ika yejon okijlikej tekiuaj makimikti. Tekiuaj okimijli makichiuilikan tlen kinekiskiaj. Kuakon okajsikej Jeremías niman okontlajkalkej ijtik se pozo uejkatlan tlen kipiaya miyek sokitl ijkon ompa mamiki. Jeremías ika yolik opeuj sokipolaki.

Se itlakeual tekiuaj akin ueyixtoya itoka katka Ébed-Mélec okijli tekiuaj: “¡Tlayekankej okontlajkalkej Jeremías ijtik se pozo! Tla ompa tijkauaj, mikis”. Tekiuaj okinauati Ébed-Mélec makinuika 30 tlakamej makikixtitij Jeremías. Jeremías xtlaj okitelti ika tenojnotsa, ¿xmelak ika tikuelitaskia tikchiuas ijkon ken yejua?