Yeremia nifili Yehowa tobali samaʼeleʼö ba niha Yehuda. Ifatenge Yeremia ba wanuriaigö hegöi ba wamangelama niha enaʼö laböhöli gamuatara si lö sökhi. Imane Yeremia, ’He Yehowa, awuyu nasa ndraʼo. Lö uʼila fahuhuo ba soi daʼa.’ Imane Yehowa, ’Böi ataʼufi. Ufatunö khöu hadia zinangea öwaʼö. Hasambalö utolo ndraʼugö.’

Iwaʼö Yehowa khö Yeremia ba wangowuloi ira sondröniaʼö, iboto mboto-boto bowoa tanö fönara aefa daʼö imane, ’Simane daʼa dania na tedudugö Yeruzalema.’ Me ifalua daʼö Yeremia, mofönu sibai ndra sondröniaʼö. Ibözi Yeremia ere sotöi Fasuri aefa daʼö isigöʼö gahe awö danga Yeremia ba galo eu. Tebai ifaliwa ia Yeremia ba zi sara wongi daʼö. Sihulö wonginia, iʼefasi ia Fasuri. Imane Yeremia, ’Tebai utaha saʼae. Lö omasido saʼae ufaʼema khöra duria andrö.’ Hewaʼae simanö, hadia sindruhu-ndruhu awuwu ia? Löʼö. Me no ifuli iʼangeragö imane Yeremia, ’Turia moroi khö Yehowa andrö hulö galitö bakha ba dödögu. Tebai utaha na lö ufatunö.’ Lö iböhöli Yeremia wamangelama soi daʼö.

Hauga fakhe aefa daʼö, so razo si bohou ba Yehuda. Lö omasi ndra ere hegöi ira samaʼeleʼö sofaya duria nifaʼema Yeremia. Lamane khö ndra sohalöwö sebua faka, ’Sinangea mate niha daʼö.’ Imane Yeremia, ’Na mibunu ndraʼodo, no mibunu niha si lö sala. Fehede Yehowa nifaʼemagu tenga fehedegu samösa.’ Me larongo daʼö, lamane ira sohalöwö sebua faka andrö, ’Tebai mubunu niha daʼa.’

Lö iböhöli Yeremia wamaʼema turia moroi khö Lowalangi, ba mofönu sibai ndra sohalöwö sebua  faka. Laʼandrö khö razo enaʼö ibunu Yeremia. Itehe khöra razo wamalua somasi ira khö Yeremia. Börö daʼö, latiboʼö Yeremia ba mbaʼa nidanö sabakha ba so tambu, enaʼö mate ia ba daʼö. Arara manö, ahöndrö Yeremia.

Aefa daʼö, so zohalöwö ba gödo sotöi Ebedi-Melekhi ifatunö khö razo imane, ’No latiboʼö Yeremia ira sohalöwö sebua faka bakha ba mbaʼa nidanö! Na lö tahalö ba tola manö mate ia.’ Ifatenge Gebedi-Melekhi andrö razo ba fao khönia 30 niha ba wondröni Yeremia moroi ba mbaʼa nidanö. Gofu hadia zalua, lö irai iböhöli Yeremia wamaʼema turia moroi khö Lowalangi. Enaʼö simane daʼö göi ita.